Ин хабар миёни корбарони тоҷики шабакаҳои иҷтимоӣ баҳсҳои зиёдеро ба вуҷуд овард ва мо қарор додем дурустии онро санҷем.
30-юми июни соли равон дар сомонаи ҳафтаномаи «Тоҷикистон» – Pressa.tj, матлабе бо номи «Чин мехоҳад занони ӯйғурро маҷбуран аз таваллуд боз дорад» нашр шудааст. Дар он гуфта мешавад, ки ҳукумати Чин ба хотири пешгирии рушди аҳолии ӯйғур занҳои ин ақалиятро маҷбурӣ ақим ё нозо мекунанд
«Таҳқиқоти наве, ки рӯзи душанбеи 29 июн нашр шуд, мегӯяд, ниҳодҳои ҳукумати Чин ба ҳадафи пешгирӣ аз рушди аҳолии ӯйғурҳо дар минтақаи Шинҷон, занҳои ин ақалиятро ба таври маҷбурӣ ақим ё нозо мекунад. Ин таҳқиқот бар асоси оморҳои давлатӣ дар минтақаи Шинҷон, санадҳои расмӣ оид ба иҷрои ин сиёсат ва мусоҳиба бо занони ақалияти ӯйғур, таҳия шудааст», гуфта мешавад дар хабар.
Аслан бори аввал нест, ки чунин хабарҳо дар бораи ақаллиятҳои миллӣ дар Чин, хоса ӯйғурҳо нашру паҳн мешаванд. Зимни санҷиш маълум шуд, ки Чин дарвоқеъ хостори боз доштани таваллуд миёни занони ӯйғур аст.
Ин маводро мо аз саҳифаи Радиои “Озодӣ” бо сарлавҳаи «Пажӯҳиш: Чин дар пайи «маҷбуран нозо кардан»-и занони ӯйғур аст» пайдо кардем ва маълум шуд, ки хабаргузории Pressa.tj аз ин манбаъ онро бознашр кардааст.
Ҳамчунин ҳангоми ҷустӯҷӯ дар сомонаҳои ҷусторӣ бо чанд забон маълумоти бисёреро ба даст овардем, ки далели дурустии ин хабар буданд. Масалан, бунёди Ҷеймстаун, ки яке аз самтҳои асосии барномаи таҳқиқотии он ба кишвари Чин бахшида шудааст, дар сомонаи худ ҳисоботи вижаеро нашр намудааст, ки он дар бораи назорати ҳатмии таваллуд ва пешгирӣ аз афзоиши аҳолии ӯйғурҳо дар минтақаи Шинҷон аз тарафи ҳукумати Чин мебошад. Гуфта мешавад, таҳқиқоти мазкур бар асоси омору санадҳои расмӣ дар минтақаи Шинҷон оид ба иҷрои ин сиёсат ва суҳбатҳо бо занони ақаллияти ӯйғур омода шудааст.
Иттиҳоди байнипарлумонӣ дар Чин, маъруф бо IPAC низ 29-уми июни соли равон аз ошкор сохтани далелҳои нав дар бораи он ки ҳукумати Чин барномаи назорати таваллудро мавриди ҳадафи ақаллиятҳои мусалмонӣ дар ноҳияи Шинҷон қарор додааст, хабар дод.
Хулоса:
Санҷиши мо нишон дод, ки ки воқеан ҳукуматдорони Чин барои пешгирӣ аз афзоиши аҳолии ӯйғурҳо ва назорати ҳатмии таваллуд миёни занони ин ақаллият дар минтақаи Шинҷон барномаҳои махсусро пиёда месозад.
Мавод дар доираи Маъракаи рушди маърифати расонаӣ дар Тоҷикистон – “Се нуқта.” омода шудааст. Ба саҳифаи “Се нуқта. Бидон, чиро мебинӣ!” дар шабакаҳои иҷтимоии Facebook ва Одноклассники пайваст шавед ва маърифати расонаии худро инкишоф диҳед!
Дигар маводҳои лоиҳаро ин ҷо хонед: Бидон, чиро мебинӣ!
