Пойгоҳи "Диссернет" боз як олими дигари тоҷикро ба асардуздӣ ҳангоми навиштани рисолаи илмияш муттаҳам кард. Ин бор ин пойгоҳ Суяров Тухтамурод Холмуродович дотсенти кафеди физикаи умумии Донишгоҳи давлатии Бохтарро ба сирқати илмӣ гунаҳкор кард.
Ба навиштаи пойгоҳ Суяров Тӯхтамурод дар рисолаи илмияш "Шаклгирии тавонои донишомӯзон бо истифода аз ҳали масаъалҳои физикӣ" ("Формирование у учащихся умения применять средства по решению физических задач"), ки соли 2012 дар Шӯрои илмии Донишгоҳи Бохтар ҳимоя кардааст, аз рисолаи илмии олими рус Андрей Никоноров фаровон рӯйбардор кардааст.
Рисолаи Никронов соли 2003 бо номи "Формирование у учащихся обобщенного умения применять средства решения в процессе решения физических задач" дифоъ шудааст.
Пойгоҳ аз 148 саҳифаи рисолаи Суяров дар 121 саҳифааш мавридҳои асардуздӣ ё плагиатро кашф кардааст. Ба навиштаи пойгоҳ Суяров аз саҳифаи 16 то 136-и рисолаи илмии худро аз кори илмии Никронов ба истиснои баъзе ҷузъиёти техникӣ, комилан гирифтааст.
Вале худи Тӯхтамурод Суяров мегӯяд, ки ӯ ба асардуздӣ роҳ надодааст ва кори илмии худро дар давоми 4 сол таҳти роҳбарии профессор Тағойбобо Шукуров холисона навиштааст.
Сӯяров ба "Азия-Плюс" гуфт, "ман ягон плагият накардам ва дар вақти ман ин гуна плагиат набуд. Мудати 4 сол рисолаи илмиро навиштам. Коро соли 2008 шуруъ кардаму соли 2012 ҳимоя кардам. Худам бо роҳбарии устод Шукуров корро навишта ҷамъбаст кардам. Намедонам онҳо барои чӣ манро ин гуна гуфтанд, ростӣ ҳайронам".
Ин устоди Донишгоҳи Бохтар мегӯяд, ки ӯ омода аст санад пешниҳод кунад, ки асардуздӣ накардааст. Ҳоло Сӯяров мегӯяд, ки рисолаи докторӣ менависад ва барои дифоъ наздик шудааст.
Пойгоҳи "Диссернет" як пойгоҳи мустақили таҳқиқотии интернетиест, ки мавридҳои асардуздӣ дар рисолаҳоеро, ки дар КОА-и Русия дифоъ шудаанд месанҷад. Ин пойгоҳ дар 3-4 соли ахир бештар аз 50 олими тоҷикро дар асардуздӣ муттаҳам кард, аммо аз ин миён танҳо Абдурасул Сангинов, мудири кафедраи Донишгоҳи давлатии тиббии Тоҷикистон ба номи Абуалӣ Сино кори ин пойгоҳро ноодилона ва нодуруст хонду ба он вокуниши расмӣ кард.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
