Дар вилояти Маскави Русия агар муҳоҷирон ва хориҷиён ҳадди ақалл қайди муваққатӣ ва полиси суғуртаи тиббии ҳатмӣ дошта бошанд, онҳоро эм кардан мумкин аст, хабар додааст муовини раиси вилояти Маскав, вазири тандурустии ин вилоят Светлана Стригункова, иттилоъ медиҳад РИА Новости.
“Агар муҳоҷирон қайд ё ҳадди ақалл қайди муваққатӣ ва полиси суғуртаи тиббии ҳатмӣ дошта бошанд, ваксина гирифта метавонанд… Агар полис надошта бошад, дар ин ҳолат дарвоқеъ ҳам мо ӯро эм карда наметавонем, ин талаботи федералӣ аст”, – гуфтааст Стригункова дар машварати раиси вилоят Андрей Воробёв бо ҳукумати вилояти Маскав ва раисони ҳавзаҳои шаҳрӣ.
Ҳамчунин ӯ зикр кардааст, ки айни замон Вазорати тандурустии Русия масъалаи имкони пулакӣ ваксингирии муҳоҷиронро баррасӣ мекунад.
Қаблан Воробёв қароре имзо кард, ки мувофиқи он ба тадбирҳои маҳдудияти дар қаламрави вилояти Маскав амалкунанда ҷиҳати муқовимат ба паҳншавии сирояти коронавирус тағйирот ворид мешавад.
Қобили зикр аст, ки аз 13 то 20 июн дар вилояти Маскав реҷаи ҳатмии ниқобпӯшӣ дар ҷойҳои ҷамъиятӣ ҷорӣ шуд. Акнун ташкилоту муассисаҳо ба роҳ додани мизоҷон ба биноҳо бидуни воситаҳои муҳофизати инфиродии узвҳои нафаскашӣ ҳуқуқ надоранд.
Ғайр аз ин, 16 июн дар бораи ваксингирии ҳатмӣ барои баъзе категорияҳои шаҳрвандон дар соҳаи хизматрасонӣ қарор ба имзо расид.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
