Додситони вилояти Суғд алайҳи масъули фермаи хукпарварии ноҳияи Ҷаббор Расулов бо ҷурми ифлос кардани оби дарёи Сир парвандаи ҷиноӣ боз кардааст.
Фурқат Хоҷазода, додситони вилояти Суғд дар нишасти хабарияш гуфт онҳо қаблан Н.Дӯстматов, роҳбари фермаии хукпарварии деҳаи Деҳмойи ноҳияи Ҷаббор Расуловро се маротиба ба ҷавобгарии маъмурӣ кашида буданд. Аммо ба гуфтаи додситонӣ хукпарвар такроран ахлот ва пешоби зиёда аз 300 сар хуки дар ферма бонишавандаро ба дарёи Сир равона кардааст, ки барои саломаии одамон хатарзо аст.
“Ин ҳолат боиси гирифтории одамон ба бемориҳои сироятӣ ва устухонӣ шуда метавонад. Аз ин рӯ додситонӣ нисбати ин ҳолат парвандаи ҷиноӣ дар асоси моддаи 226 қисми 1-и Кодекси ҷиноятӣ боз кард. Ин парванда ҷавобгарии ҷиноятиро барои ифлос ё олуда кардани обҳои рӯизаминию зерираминиро муқаррар намудааст ва тафтишот анҷом ёфтааст”/
Додситони Суғд мегӯяд, парванда ҳоло барои моҳиятан барраси шудан ба додгоҳи ноҳияи Ҷаббор Расулов ирсол шудааст ва дар марҳилаи баррасии додгоҳӣ қарор дорад.
Моддаи 226, қисми 1-и Кодекси ҷиноятӣ “Ифлос кардани об” унвон дорад, ки ҷавобгарӣ ба корҳои ҳатмӣ ба мӯҳлати аз яксаду чил то дусаду чил соат ё ҷарима ба андозаи то панҷсад нишондиҳанда барои ҳисобҳо ё бо корҳои ислоҳӣ ба мӯҳлати то ду сол ё маҳдуд кардан аз озодӣ ба мӯҳлати ду солро пешбинӣ кардааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
