Пас аз чанд рӯзи фирори президенти Афғонистон Ашраф Ғанӣ аз кишвараш, Вазорати корҳои хориҷии Амороти Муттаҳидаи Араб (АМА) 18 август хабар дод, ки ӯ ҳамроҳ бо хонаводааш “ба хотири риояи аҳдофи башардӯстона” дар ин давлат ҳузур дорад.
Дар зер нуктаҳои асосии паёми видеоии Ашраф Ғаниро пас аз фирораш, ки дар саҳифаи фейсбукаш нашр шуд, манзуратон мегардонем:
* Ман дар АМА ҳастам ва бо як пероҳану пойпӯш аз кишвар берун шудам;
* Масъулони амниятӣ ба ман хабар доданд, ки тавтеаи ҷонӣ дар каминам будааст;
* Ҷангҷӯёни Толиб дар атрофи дарвозаи Арг буданд;
* Намояндагони байналмилалӣ ба ман гуфтанд, ки агар ман наравам, вазъ бадтар мешавад;
* Ман маҷбур будам кишварро тарк кунам;
* Толибон ва афроди номаълум вориди Арг шуданд. Онҳо ҳуҷра ба ҳуҷра мегаштанд;
* Бояд як ҳодисаи хунин мисли 25 сол пеш рӯй медод;
* Афғонистон мисли Сурияву Яман мешуд;
* Беиззатии Афғонистонро намехостам;
* Барои ҷилавгирӣ аз вуруди афроде, ки бо забони бегона ҳарф мезананд, ҳеҷ кас муқобилият нишон надод;
* Ба касоне ки мегӯянд аз кишвар фирор кардам мегӯям, бидуни далел қазоват накунед;
* Ба касоне, ки мегӯянд раиси ҷумҳуратон гурехт, бовар накунед;
* Ман ҳеҷ чизе бо худ набурдаам;
* Берун овардани пул аз Афғонистон тавассути ман дурӯғ аст;
* Аз гуфтаҳои сулҳи кунунӣ, ки тавассути Абдуллоҳ Абдуллоҳ ва Ҳомид Карзай пайгирӣ мешавад истиқбол мекунам ва комёбиашонро мехоҳам;
* Дубора аз ҳама нерӯҳои амниятии худ ташаккур мекунам;
* Ман қасди фирор надорам. Айни ҳол дар Амороти Муттаҳидаи Араб ҳастам то аз хунрезӣ ҷилавгирӣ шавад;
* Машвара дорам, ки дубора ба Афғонистон баргардам.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
