Додгоҳи олии Тоҷикистон гумонбари асосии латукӯби Мадина Мамадҷонова Азиза Давлатоваро ба 11 соли зиндон маҳкум кард. Дар ин бора як манбаи наздик ба парванда хабар дод.
Манбаъ гуфт, нисбати Давлатова Қонуни афви соли 2021 татбиқ шуда, муҳлати ӯ як сол кам карда шуд. Ӯ акнун 10 сол паси панҷара мемонад.
Вай ҳамчунин афзуд, Азизаро бо моддаи пешина -«сӯиқасд ба куштор» айбдор карда, моддаро дубора бознигарӣ накарданд.
Мадина Мамадҷонова, ки гуфта мешавад аз ҷониби зани Парвиз (Лутфулло) Давлатов, яке аз иштирокчиёни дигари “қазияи Мадина” моҳи августи соли равон мавриди латукӯби шадид қарор гирифт, баъди беш аз се моҳи беҳушӣ рӯзи 15 декабр дар беморхона даргузашт.
Гуфта мешавад, ки ҳукм аз ҷониби Додгоҳи олӣ рӯзи 28-уми декабр дар СИЗО-и шаҳри Душанбе пушти дарҳои баста содир шуд.
Назари наздикони Азиза Давлатова дар робита ба ҳукми содиршуда то ҳол маълум нест.
Ҳамин тариқ, мавқеи наздикони Мадина Мамадҷонова низ маълум нест, ки ба ҳукм розӣ ҳастанд ё не.
Аз ин пештар Додгоҳи олӣ Парвиз (Лутфулло) Давлатов яке аз иштирокчиёни дигари “қазияи Мадина”-ро ба 8 соли зиндон маҳкум карда буд.
“Ӯро додгоҳ бар асоси се моддаи Кодекси ҷиноятии Тоҷикистон гунаҳкор дониста ба 8 соли зиндон ҳукм кард. Аммо бо татбиқи Қонуни авфи моҳи сентябр ҳукми ӯ то 5 солу 4 моҳ кам карда шуд”, – гуфта буд он замон як манбаи “Азия-Плюс”.
Нисбати ӯ бо се моддаи Кодекси ҷонятии ҶТ – "азобу уқубат", "бисёрзанӣ", "расонидан ба худкушӣ" паравнда боз шудааст. Аммо дар изҳороти расмии Додситони кулли Тоҷикистон танҳо аз як модда – азобу уқубат ном бурда мешуд.
“Қазияи Мадина”
Қазияи Мадина Маҳмадҷонова, ки баъди латукӯб беш аз се моҳ дар кома буда, рӯзи 15 декабр даргузашт, яке аз парвандаҳои пурсарусадо дар як соли охир ба шумор меравад, ки ба он раисҷумҳури Тоҷикистон Эмомалӣ Раҳмон ва раиси Маҷлиси миллӣ ва шаҳрдори Душанбе Рустами Эмомалӣ таваҷҷуҳ намуданд.
Мадина Мамадҷонова 25 августи соли равон ғайб зада, баъди 14 соат бо ҷароҳатҳои вазнин ба бемористон интиқол ёфт. Пизишкон гуфтанд, эҳтимол ӯро нафасгир кардаанд ва аз нарасидани ҳаво мағзи сараш осеб дидааст.
Охири моҳи октбяр фаъолони ҷомеаи шаҳрвандӣ ба унвони раиси шаҳри Душанбе, додситони кулл ва вазири корҳои дохилии Тоҷикистон муроҷиатнома навишта, хостори одилона тафтиш шудани парвандаи Мадина шуданд. Рустами Эмомалӣ «парвандаи Мадина»-ро таҳти назорати шахсӣ гирифта, бо дастури ӯ Додситони кул ва Вазорати умури дохила ба санҷиши дубораи ҳолати кор оғоз карданд.
Рӯзи 1 ноябри соли равон Додситонии кулли Тоҷикистон бо нашри иттилоияи расмӣ хабар дод, ки нисбати Азиза Давлатова ва шавҳараш Лутфулло Давлатов, ки ба латукӯби Мадина Мамаҷонова гумонбар дониста мешаванд, парвандаи ҷиноятӣ боз кард. Аввалӣ барои қасди одамкушӣ ва дуввумӣ барои азобу уқубат ба ҳабс гирифта шуданд.
Рӯзи 1 декабр Додситони кулли Тоҷикистон дар посухи катбӣ “Азия – Плюс” гуфта буд, ки 18-уми ноябри соли 2021 парвандаи латукӯби Мадина Маҳмадҷонова барои баррасӣ ба Додгоҳи олии Тоҷикистон ирсол шудааст.
Додситонӣ дар дар бораи парванда ҷузъиёти бештар надода, гуфт, бархе ҷузъиёти он “бо сабаби сири тафтишоти мавриди ифшо қарор намегирад”.
Ҳамчунин, Радиои “Озодӣ” аз қавли манбаъҳои худ хабар дод, ки дар робита ба парвандаи латукӯби Мадина Мамадҷонова ду масъули мақомоти ҳифзи ҳуқуқи Тоҷикистон аз вазифаҳои худ барканор шуданд. Сабаби барканории харду мақомдор “тафтиши ноодилонаи парвандаи Мадина Мамадҷонова” гуфта мешавад.
Сардори ШВКД ноҳияи Сино Зафар Исмоилзода барои “парвандаро дуруст таҳқиқ накардан” ва муовини аввали додситонии ҳамин ноҳия Сӯҳроб Салимзода барои имзои қарори афви як гумонбар дар парвандаи Мадина Мамадҷоноваро аз кор гирифтанд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
