Тоҷикистон ва Бонки ҷаҳонӣ Созишнома оид ба маблағгузории Лоиҳаи барқарорсозии Неругоҳи барқи обии «Норак», марҳилаи II-ро бо арзиши 65 млн доллар (бар асоси грант) ба имзо расониданд.
Санад рӯзи 18 май аз ҷониби вазири молияи Тоҷикистон Файзиддин Қаҳҳорзода, раиси ШСХК “Барқи тоҷик” Маҳмадумар Асозода ва намояндаи доимии Бонки ҷаҳонӣ дар Тоҷикистон Озан Севимлӣ имзо шуд, хабар дода мешавад дар сомонаи расмии Вазорати молияи ҷумҳурӣ.
Ёдрас мекунем, ки ҷудо кардани ин маблағро охири моҳи декабри соли гузашта Шӯрои мудирони Бонки ҷаҳонӣ маъқул шуморида буд.
Татбиқи марҳилаи I лоиҳаи барқарорсозии неругоҳи Норак бо маблағгузории Бонки ҷаҳонӣ ($225,7 млн), Бонки осиёии сармоягузории инфрасохторӣ ($60 млн) ва Бонки аврусоёии рушд ($40 млн) моҳи марти соли 2019 оғоз гардида буд.
Марҳилаи якуми лоиҳа аз 4 қисм – иваз кардани 3 агрегат ва таҷҳизоти ёрирасони онҳо, инчунин автотрансформаторҳо (6 адад автотрансформаторҳои якфазаи 220/500кВ) ва таъмини бехатарии садд иборат буда, муҳлати татбиқи он давоми 5 сол (солҳои 2019-2023) пешбинӣ шудааст.
Марҳилаи дуюми лоиҳа (то соли 2028) бо маблағгузории Бонки ҷаҳонӣ (50 млн доллар моҳи июни соли 2020 тасдиқ шуд) таҷдиди 6 агрегати боқимонда ва таҷҳизоти ёрирасони неругоҳро дар бар мегирад. Дар доираи он имконоти ҳайати шахсии неругоҳи Норак ва ШСХК “Барқи тоҷик” баҳри пурзӯр кардани мониторинги бехатарии сарбанд, истифода ва идоракунии иншооти гидротехникӣ тақвият дода мешавад.
То имрӯз барои маблағгузории марҳилаи 1-уми лоиҳа 326,9 млн доллар, аз ҷумла 169,1 млн доллар ба сифати қарз ва 57,8 млн доллар – ба сифати грантҳои Бонки ҷаҳонӣ ҷалб шудааст.
Неругоҳи барқи обии “Норак” ҳудуди 50% аз ҳаҷми умумии талабот ба барқро дар Тоҷикистон таъмин намуда, қисмати зиёди онро ба хориҷи кишвар ҳам интиқол медиҳад. Бар асари мушкили техникӣ, тайи чор даҳсолаи ахир иқтидори дар аввал муқарраршудаи неругоҳ аз 3,000 мегаватт то 2,320 мегаватт кам шуд. Аз замони мавриди баҳрабардорӣ қарор гирифтан давоми солҳои 1972-1979 айни замон дар иншоот бори нахуст корҳои асосии таъмиру барқарорсозӣ гузаронида мешаванд.
Пас аз анҷоми корҳои таъмиру барқарорсозӣ иқтидори неругоҳ то 3,217 мегаватт боло бурда шуда, ба беҳбуди таъминот бо барқ дар мавсими зимистон ва афзоиши даромад аз тавсеъаи содироти он дар мавсими тобистон мусоидат менамояд.
