Дар сомонаи “Азия-Плюс” рӯзи 18 ноябр дар бораи ин муомилоти хариду фурӯш маълумот дода шуд. Роҳбари ҶСП “Бонки байналмилалии Тоҷикистон” Раҷабов Искандар Ҳабибуллоевич ин масъаларо тарики зайл шарҳ дод:
– Ба охир расидани муомилоти харид бо ҶСП “Бонки байналмилалии Тоҷикистон” ба фаъолияти амалиётии “Халиқ бонк Тоҷикистон” (ХБТ) чӣ гуна таъсир мерасонад?. Дар мавриди хидматрасонӣ ба мизоҷон ва амонатҳо кадом тағйирот дар назар аст?
– Бо анҷоми муомилоти хариду фурӯш бонк ба хидматрасонии мизоҷон тибқи ҳамаи уҳдадориҳои ХБТ идома дода, айни замон ҳеҷ гуна тағйироти назаррас ба нақша гирифта нашудааст.
– Дар мавриди рушди “Халиқ бонк Тоҷикистон” ҶСП “Бонки байналмилалии Тоҷикистон” чӣ нақшаҳо дорад?
– Дар ҷараёни имзои муомилот Бонки байналмилалии Тоҷикистон пешакӣ баъзе масоили рушди минбаъдаро баррасӣ намуд. Зимни гуфтугӯ дар бораи сармоягузорӣ, тавсеъаи шабакаи филиалҳо, зиёд кардани ҷойҳои корӣ, рақамикунонии амалиёти бонкӣ ва дигар паҳлӯҳои фаъолияти бонкӣ изҳори назар кардем.
– Дар сохтори тадорукотӣ (ташкилӣ)-и ХБТ тағйирот мешавад? Ҷойҳои корӣ нигоҳ дошта мешаванд?
– Дар сохтори тадорукотӣ ҳоло тағйирот дар назар нест, лекин тадриҷан зимни зарурат шояд сохтор беҳтар карда шавад. Дар мавриди ҳайати шахсӣ бошад, айни замон кормандон ихтисор намешаванд.
– Амалиёт бо хазина / шуъбаҳои бонк чӣ гуна мешавад? Онҳо ба кори худ бидуни тағйирот дар реҷаи муқаррарӣ идома медиҳанд ё тағйирот ҷорӣ мешавад?
– Бонк бо реҷаи муқаррарӣ ба фаъолият идома дода, инчунин сармоягузориҳои нав, тавсеъаи шабакаи филиалҳо ба нақша гирифта шудааст.
Ёдрас мекунем, ки хабар дар бораи фурӯши 100% саҳмияҳои ҶСП “Халиқ бонк Тоҷикистон”чанде пеш дар сомонаи филиали бонк дар Тоҷикистон нашр шуд.
Зикр гардида буд, ки ҶСП “Бонки байналмилалии Тоҷикистон” (ББТ) ҳамаи расмиёти маъқул шумориданро аз Бонки миллӣ гирифт. Муомилот моҳи декабри соли 2022 ба анҷом мерасад.
Дар ҷараёни муомилот ва ҳатто ба охир расидани ҳамаи расмиёти зарурии гузариш, Бонк бо реҷаи муқаррарӣ кор карда, мувофиқи шартҳои созишномаи пешина ҳамаи навъҳои хидматрасонии бонкиро пешниҳод хоҳад кард.
