Бо қарори ҳукумати Тоҷикистон аз 19 декабри соли гузашта Донишкадаи давлатии забонҳои Тоҷикистон ба номи Сотим Улуғзода расман ба Донишгоҳи байналмилалии забонҳои хориҷии Тоҷикистон ба номи Сотим Улуғзода табдили ном кард.
“Барои устодон ва донишҷӯёни Донишгоҳи байналмилалии забонҳои хориҷии Тоҷикистон ба номи Сотим Улуғзода ин дастоварди таърихӣ, рӯйдоди муҳим ва иқдоми беназир аст”, – изҳор доштаанд ба АМИТ “Ховар” аз донишгоҳ.
Табдили номи донишкадаро ҳанӯз 27 сентябри соли 2022 президенти ҷумҳурӣ Эмомалӣ Раҳмон зимни ифтитоҳи биноҳои нави ин муассисаи таълимӣ пешниҳод карда буд.
Дар ин асос ба Вазорати маориф ва илм ва дигар вазорату идораҳо дастур дода шуд, ки дар муддати 3 моҳ санадҳои меъёрии ҳуқуқии заруриро доир ба ин масъала таҳия ва ба ҳукумати мамлакат пешниҳод намоянд.
Айни замон дар донишкада бо 11 забон (тоҷикӣ, русӣ, англисӣ, олмонӣ, фаронсавӣ, чинӣ, куриёӣ, ҷопонӣ, ҳиндӣ, арабӣ ва форсӣ) аз рӯйи 41 ихтисоси ҷавобгӯ ба талаботи бозори меҳнат мутахассис тайёр карда мешавад.
Ҳамзамон бо ин, донишкада бо 52 муассисаи таҳсилоти олии кишварҳои хориҷӣ ва ташкилоту муассисаҳои минтақавию байналмилалӣ робитаҳои ҳамкорӣ ба роҳ мондааст, ки ба пешрафти ҳамаҷонибаи фаъолият мусоидат менамояд.
Дар ин давра 2700 нафар шаҳрвандони 19 кишвари дуру наздики хориҷӣ ҳамчун донишҷӯву аспирант, инчунин дар курсҳои кӯтоҳмуддати забономӯзии донишкада таҳсил кардаанд.
Илова бар ин, соли 2021 дар заминаи факултаи забони англисӣ маркази тестии забони англисӣ ба фаъолият оғоз намуд, ки дар байни дигар муассисаҳои таълимӣ ягона мебошад.
Ҳамчунин дар донишкада курсҳои кӯтоҳмуддати забономӯзӣ ба роҳ монда шудаанд, ки дар онҳо шаҳрвандони мо ба омӯзиши забонҳои хориҷӣ ҷалб мегарданд.
