Рӯзҳои 9-10 феврал дар ҷумҳурӣ якуякбора ноустуворшавии вазъи обу ҳаво дар назар аст. Ба иттилои Агентии обуҳавошиносии ҷумҳурӣ, ҳарорати рӯзонаи ҳаво дар қисми зиёди ноҳияҳо то 8-10 дараҷа паст мешавад.
Гуфта мешавад, 9 феврал дар водиҳо асосан борон меборад ва дар ноҳияҳои кӯҳӣ боришот (борон, барф) ба амал омада, 10 феврал дар водиҳо боришоти борон ба барф мегузарад ва дар ноҳияҳои кӯҳӣ асосан барф меборад.
Ба иттилои манбаъ, дар ин давра (рӯзҳои 9-10 феврал) боришоти бошиддат дар минтақаҳои кӯҳии Ноҳияҳои тобеъи ҷумҳурӣ, доманакӯҳҳои вилояти Хатлон ва ғарби ВМКБ аз эҳтимол дур нест.
Зикр мегардад, ки рӯзҳои 7-11 феврал дар минтақаҳои кӯҳии Ноҳияҳои тобеъи ҷумҳурӣ ва ғарби ВМКБ, дар шоҳроҳи Душанбе – Чаноқ (километрҳои 44-79) сар задани зуҳуроти тарма пешгӯӣ мешавад.
Дар Душанбе ва Ноҳияҳои тобеи ҷумҳурӣ ҳарорат аз 16 дараҷа гарми имрӯз рӯзҳои минбаъда то 4 дараҷа гарм рӯзона ва 4 дараҷа хунук шабона поин меравад. Ҳавои абрнок, боришот (борону барф), туман дар назар аст.
Дар шаҳри Хуҷанд ва вилояти Суғд ҳарорати 10 дараҷа гарм ба 3 дараҷа хунук рӯзона ва то 10 дараҷа хунук шабона иваз мешавад. Баъзан бошиддат борон борида, туман мефарояд.
Дар шаҳри Бохтар ва вилояти Хатлон обуҳавои абрнок ва боридани борон, баъзан пуршиддат пешгӯӣ мешавад. Ҳарорат рӯзона 6-8 дараҷа гарм ва шабона аз 3 дараҷа хунук то 2 дараҷа гарм мешавад.
Дар шаҳри Хоруғ ва ВМКБ ҳавои абрнок ва баъзан боридани барф пешбинӣ мешавад. Ҳарорати ҳаво тағйир ёфта дар ғарби вилоят шабона аз 4-9º хунук то 12-17º хунук, рӯзона аз -2+3º то 1-6º хунук, дар шарқи вилоят шабона аз 17-22º хунук то 25-30º хунук (дар мавзеи Булункӯл то 38-40º хунук), рӯзона аз 4-9º хунук то 10-15º хунук (дар мавзеи Булункӯл то 18-20º хунук) мешавад.
Дар ҳамин иртибот КҲФ аз шаҳрвандон даъват мекунад, ки дар ин рӯзҳо сафарҳои худро дар роҳҳои кӯҳӣ бидуни зарурати таъҷилӣ маҳдуд намуда, аз корҳои кишоварзӣ, чаронидани чорво, моҳидорӣ, ғунучини ҳезум ва шикор дар манотиқи кӯҳистон худдорӣ кунанд, ҳангоми истифодаи дастгоҳҳои барқии гармкунанда ва истифода аз бухориҳое, ки бо ангишт гарм мешаванд, қоидаҳои бехатарии сӯхторро қатъиян риоя намоянд.
Ба хотири рух надодани ҳодисаҳои нохуш дар роҳҳо, Кумита аз ронандагон дархост менамояд, ки бо суръате ҳаракат кунанд, ки бехатариро дар ҷойҳои сермошин, назди мактабу гардиш ва нишеб фаромадан таъмин созад.
Тавсия мешавад, ки ҳангоми ҳаракат дар роҳҳои кӯҳӣ масофаи байни мошинҳо назар ба муқаррарӣ дарозтар нигоҳ дошта шавад, зеро масофаи манъкунӣ (боздоштан)-и мошин дар роҳҳои лағжон хеле зиёдтар мешавад.
