Бо оғози мавсими Ҳаҷ баҳси маблағи он доғ мешавад. Имсол низ ин чиз истисно набуд ва баъди ҷудо кардани 7 ҳазор квотаи Ҳаҷ-2023 аз ҷониби Арабистони Саудӣ ба Тоҷикистон баҳси харҷи он рӯй зад. Билохира, чанд рӯз пеш Кумитаи дини кишвар эълон кард, ки мабалғи Ҳаҷ-2023 59 ҳазор сомонӣ ва ё 5,4 ҳазор доллари ИМА аст.
Маблағи мазкур хароҷоти аввалияи зоиронро дар мавсими ҳаҷ, аз билети рафту баргашт то меҳмонхона дар Макка ва Мадина, қурбонии ҳоҷиён, бима ва боҷи давлатӣ дар бар мегирад.
Ин нарх нисбат ба соли гузашта 1 ҳазору 520 сомонӣ арзонтар аст, вале назар ба баъзе кишварҳои Осиёи Марказӣ қиммат ба назар мерасад. Бо ишора ба ин, “Азия-Плюс” тасмим гирифт, ки нархи Ҳаҷҷи фарзӣ дар кишварҳои Осиёи Марказӣ ва Русия дар соли 2023 муқоиса кунад.
Ёдовар мешавем, ки нархи ҳаҷҷи фарзӣ вобаста ба сифати хидматрасониҳои кишварҳо фарқ мекунад. Масалан, бо маблағи 4,9 ҳазор доллар ширкатҳои русӣ ба зоирон танҳо ду вақт хӯрок медиҳад ва меҳмонхонааш аз ҳарам дур аст. Аммо ба маблағи 9,9 ҳазор доллар ширкатҳои русӣ ба зоирон се вақт хӯрок ва меҳмонхонаи панҷситорадор ваъда медиҳанд.
Мавсими Ҳаҷ-2023 тамоми моҳи июн сурат хоҳад гирифт.
