Сабрина Зуҳурова, модели тоҷик, ки дар намоиши ҳафтаи мӯд дар Корея Тоҷикистонро муаррифӣ кард, ба садри панҷгонаи беҳтарин моделҳои “The biggest Fashion Week in the world” ворид шуд ва ба ҳафтаи мӯди “Paris Fashion Week” даъват гардид.
Сабрина инчунин сафири “Word Busan Expro 2030” шуд. Ӯ шаҳри Пусани Кореяро, ки бо шаҳрҳои Одесса (Украина), Рим (Италия) ва Ар-Риёз (Арабистони Саудӣ) рақобат мекунанд, таблиғ мекунад. Дар ин бора худи Сабрина ба “Азия-Плюс” хабар дод.
“5 духтар ба Париж даъватнома гирифтанд ва ман дар байни онҳо ҳастам. Ман инчунин ба унвони сафири “Word Busan Expro 2030” интихоб шудам ва аз ин хеле шодам. Хурсандии худро баён намудан ғайриимкон аст ”- гуфт ӯ.
Баргузории ҳафтаи мӯд дар Париж моҳи сентябри соли ҷорӣ дар назар аст.
“Ман хеле шодам, ки бори дигар Тоҷикистонро дар сатҳи ҷаҳонӣ муаррифӣ хоҳам кард ва аз ҳамаи онҳое, ки маро дастгирӣ карданд, миннатдорам”, – гуфт Сабрина.
Ёдовар мешавем, ки аз 24 то 31 май дар Корея ҳафтаи мӯд “The biggest Fashion Week in the world” баргузор шуд. Дар он духтарон аз 53 кишвари ҷаҳон ширкат доштанд, ки дар миёни онҳо Сабрина Зуҳурова низ буд.
Қаблан Сабрина ба “Азия-Плюс” хабар дода буд, ки дар ҳафтаи мӯд дар Корея тарроҳон аз Лондон, Лас Вегас, Ню Йорк, Париж, Дубай ва Корея ширкат мекунанд.
Тибқи талабот, дар намоиш духтароне, ки чеҳраи ҳафтаи муд дар кишвари худ ва ё чеҳраи ягон ширкат буданд, метавонанд дар ин ҳафтаи муд ширкат кунанд. Азбаски Сабрина чеҳраи ҳафтаи мӯд дар Тоҷикистон аст, ӯро даъват карданд ва ӯ ягона ширкаткунанда аз ҷумҳурӣ аст.
Ӯ гуфта буд, ки беҳтарин моделҳо барои ширкат дар ҳафтаҳои мӯд дар Париж ва Милан даъват хоҳанд шуд.
Сабрина қайда буд, ки дар чаҳорчӯби ҳафтаи муд либосҳои миллӣ намоиш дода намешаванд ва онҳо танҳо бо либосҳои тарроҳони хориҷӣ ба рӯи саҳна мебароянд.
Ёдовар мешавем, ки Сабрина Зуҳурова қаблан дар озмунҳои гуногуни зебоӣ ширкат карда, унвонҳои зиёде дорад.
