Дар баъзе манотиқи Тоҷикистон ин ҳафта то 41 дараҷа гармӣ пешгӯӣ мешавад. Эҳтимол аст дар вилояти Хатлон чангу ғубор ва дар баландкӯҳҳои Вилояти Мухтори Кӯҳистони Бадахшон (ВМКБ) борону барф борад. Дар ин бора аз Агентии обуҳавошиносӣ ба “Азия-Плюс” иттилоъ доданд.
Ба гуфтаи манбаъ, аз 6 то 10-уми июн тақрибан дар саросари ҷумҳурӣ гармои шадид дар назар аст.
Ҳавошиносон ҳушдор медиҳанд, ки ҳарорати ҳаво дар Душанбе то охири ҳафта бебориш, вале нимаабрӣ хоҳад буд. Ҳарорат шабона 21-23 ва рӯзона 36-38 дараҷа гарм мешавад.
Дар вилояти Хатлон рӯзҳои 6 ва 7-уми июн ҳарорати ҳаво рӯзона 35-40 ва аз 8 то 10-уми июн 36-41 дараҷа гарм мешавад.
Дар вилояти Суғд давоми ҳафта ҳаво нимаабрӣ ва то 9 июн бебориш пешбинӣ мешавад ва танҳо 10-уми июн дар баъзе ноҳияҳои кӯҳӣ эҳтимоли боридани борони кӯтоҳмуддат аст.
Ҳарорат дар водиҳо шабона 18-23 дараҷа ва рӯзона 34-39 дараҷа ва дар ноҳияҳои кӯҳӣ шабона 6-11 ва рӯзона 21-26 дараҷа гарм хоҳад шуд.
Дар шаҳри Хуҷанд ин рӯзҳо ҳаво шабона 21-23 ва рӯзона 37-39 дараҷа гарм мешавад.
Дар ВМКБ пагоҳ, 7-уми июн, дар баъзе ҷойҳо борони сабук (дар баландии бештар аз 3000 метр борону барф) меборад.
Ҳарорат дар ВМКБ шабона 8-13 ва рӯзона 17-19 дараҷа гарм мешавад.
Дар шаҳри Хоруғ давоми ҳафта ҳаво нимаабрӣ ва бебориш буда, шабона 11-13 ва рӯзона 25-28 дараҷа гарм мешавад.
Дар навоҳии тобеи ҷумҳурӣ ҳаво бебориш шуда, танҳо 10-уми июн дар баъзе ноҳияҳои кӯҳӣ борони кӯтоҳмуддат меборад ва эҳтимоли ба вуҷуд омадани раъду барқ ҳаст. Ҳарорат дар водиҳо шабона 18-23 ва рӯзона 34-39 дараҷа гарм мешавад. Дар ноҳияҳои кӯҳӣ шабона 12-17 ва рӯзона 27-32 дараҷа гарм мешавад.
Мутахассисони Агентии обуҳавошиносии кишвар ба сокинон тавсия медиҳанд, ки дар ин рӯзҳо либоси сабуки пахтагин, айнаки офтобӣ ва кулоҳ пӯшида, бештар об нӯшанд.
