Додситонии вилояти Хатлон маводҳои вобаста ба садамаи нақлиётии дар ноҳияи Абдураҳмони Ҷомӣ рухдодаро, ки боиси марги шаш нафар гардид, талаб карда, таҳқиқи ҳодисаро ба зимма гирифтааст.
Валӣ Ваҳҳобов, муовини додситони вилояти Хатлон зимни нишасти матбуотӣ, ки имрӯз, 26-уми июл баргузор шуд, дар посух ба саволи хабарнигорон гуфт, ки “ҳодисаро айни замон прокуратураи вилоят таҳқиқ дорад”.
“Муфатишон баёноти шоҳидон, сабти камераҳои назоратии яке аз мағозаҳоро дастрас кардаанд. Ҳамаи паҳлӯҳои ин ҳодиса омӯхта шуда, дар асоси далелҳо қарори қонунӣ қабул карда мешавад”, – гуфт Валӣ Ваҳҳобов.
Аммо ӯ аз ироаи ҷузъиёти садами мазкур худдорӣ кард ва нагуфт, ки омили аслии он чӣ аст.
Садмаи мазкур рӯзи 21 июл рух дода, дар натиҷаи он 6 нафар ҷон бохтанд. Дар шабакаҳои иҷтимоӣ навори ин садама бо шарҳи ин ки он бо таъқиби маъмурони БДА рух додааст, нашр шуд.
Радиои Озодӣ бо такя ба манобеаш аз миёни сокинони маҳаллӣ навиштааст, “мошине, ки ба садама дучор шуд, барои итоат накардани ба амри нозирони БДА аз ҷониби нозирон таъқиб мешуд ва эҳтимол ҳангоми фирор бо суръати баланд чаппа шудааст”.
Бо гузашти 5 рӯз аз садама, мақомоти расмӣ, аз ҷумла ВКД то ҳол онро расман шарҳ надодаанд. Кӯшишҳои мо барои дастрас кардани иттилоъ аз ниҳодҳои расмӣ бесамар буд.
Ҳоло танҳо маълум аст, ки аз шаш нафари ҷонбохта, 4 нафари онҳо, бо шумули як кӯдак пайдо шудаву ҷустуҷӯи ду кӯдаки дигара идома дорад.
