Музди меҳнати миёнаи моҳонаи номиналии кормандони низоми бонкӣ дар Тоҷикистон тайи ду соли ахир қариб 36% ва кормандони бахши кишоварзӣ – 20% зиёд шудааст.
Қобили зикр аст, ки тибқи маълумоти Агентии омор, аввалиҳо маоши аз ҳама баланд ва дуюмиҳо – аз ҳама пасттарро мегиранд.
Ҳаҷми музди меҳнати миёнаи хидматчиёни бонкӣ то аввали нимсолаи аввали соли ҷорӣ ба 5822 сомонӣ (532 доллар) расид ва ин ҳам дар ҳолест, ки дар ҳамин давраи соли 2021 маоши миёнаи онҳо 4291 сомониро ташкил медод.
Музди меҳнати кормандони бахши кишоварзӣ дар ин давра аз 597 сомонӣ то 719 сомонӣ (66 доллар) расидааст.
Ба ин тариқ, фарқият байни музди меҳнати кормандони бонкҳо ва кишоварзон дар муддати ду сол то 8 баробар афзудааст.
Маоши миёнаи моҳонаи номиналӣ дар ҷумҳурӣ то 1 июли соли ҷорӣ 2227 сомонӣ (203 доллар) ва музди меҳнати ҳадди ақалл – 600 сомонӣ (55 доллар)-ро ташкил додааст.
Музди меҳнати номиналӣ – маблағи мушаххасе мебошад, ки корманд барои кораш мегирад. Аз маоши воқеӣ бо он фарқ мекунад, ки дар музди меҳнати воқеӣ таваррум (афзоии нархҳои истеъмолӣ ва тарифҳо ба молу хидматгузориҳо) ба инобат гирифта мешавад.
Дар ҳамин ҳол, байни кишварҳои минтақаи Осиёи Марказӣ музди меҳнати миёнаи моҳона дар Тоҷикистон дар сатҳи пасттарин қарор дорад.
Мувофиқи маълумоти расмӣ, то аввали нимсолаи дуюми соли ҷорӣ музди меҳнати миёна дар Қазоқистон 807 доллар, Ӯзбекистон – 358 доллар ва Қирғизистон – 352 долларро ташкил додааст.
Дар бораи ҳаҷми музди меҳнати миёнаи моҳона дар Туркманистон маълумоти расмӣ дастрас нест.
