Нашрияи The Wall Street Journal бо такя ба мансабдорони мисрӣ хабар медиҳад, ки ду рӯз пеш, рӯзи чаҳоршанбеи 20-уми декабр Исмоил Ҳания, яке аз роҳбарони гуруҳи Ҳамос дар шаҳри Қоҳираи Миср бо намояндагони мақомоти ин кишвар мулоқот карда, оид ба оташбаси пешниҳодкардаи Исроил дар навори Ғазза гуфтугӯ кардааст.
Аммо, манобеи нашрияи The Wall Street Journal гуфтаанд, ки мулоқот ва гуфтугӯ оид ба эълони оташбас бесамар анҷомидааст.
Ба иттилои манобеи The Wall Street Journal Исроил пешниҳод дорад, ки дар ивази озодии 40 гаравгон аз асорати Ҳамос омода аст, оташбаси 7-рӯза эълон кунад. Аммо намояндагони Ҳамос ин пешниҳодро напазируфта, талаб кардаанд, ки пеш аз оғози гуфтугӯҳо дар бораи созиши оташбас Исроил бояд ҳамла ба навори Ғаззаро қатъ ва артишашро аз онҷо берун барад.
Исроил дар навбати худ гуфтааст, ки “амалиёти ҷангиро дар навори Ғазза қатъ нахоҳад кард”. Бояд зикр кард, ки Исроил аллакай чандин маротиба ба даъвати қатъи даргирӣ аз ҷониби давлатҳову созмонҳои байналмилалӣ посухи рад дода, ҳамеша таъкид кардааст, ки амалиётро идома хоҳад дод.
Ёдовар мешавем, қабл аз ин Ҳамос ва Исроил ба оташбаси кӯтоҳмуддат даст ёфта буданд ва дар ҷараёни он беш аз 100 асири исроилиро раҳо кард ва бар ивази ин Исроил беш аз 200 нафар фаластинии зиндоризо озод намуд.
Даргирӣ дар Ховари Миёна 7-уми октябр, дар пайи ҳамлаи гуруҳи Ҳамос ба Исроил, ки бар асари он 1200 исроилӣ куштаву беш аз 200 нафар асир гирифта шуданд, оғоз гардид.
Баъди ин Исроил ба навори Ғазза ҳуҷум кард ва то имрӯз наздики 20 ҳазор фаластинӣ, ки аксари онҳо занону кӯдакон мебошанд, кушт.
