Дар ноҳияи Панҷ бар асари боронҳои шадид сел омада, ба хонаҳо ва қитъаҳои замини наздиҳавлигии сокинон осеб расонид.
Тавре ки Кумитаи ҳолатҳои фавқулодаи ҷумҳурӣ хабар медиҳад, дар ҷамоати деҳоти Намуна сел 8 хонаи истиқоматӣ ва 3 заминҳои наздиҳавлигии сокинонро аз лойқа пур кардааст.
Ҳамчунин дар қаламрави ҷамоати деҳоти ба номи Кабут Сайфутдинов, деҳаи Пахтакор ба 10 хона ва 33 заминҳои наздиҳавлигӣ, дар маҷмуъ ба 36,6 га заминҳои хоҷагии деҳқонӣ обу лойқа даромада, қисман зарар расонидааст.
Ҳамчунин дар ҷамоати деҳоти Озодагон сатҳи оби канали Келенчи-2 баланд гардида, дар натиҷа ба 2 хонаи истиқоматӣ ва дар маҳаллаи Қушқия ба 6 хонаи истиқоматӣ ва 2 замини наздиҳавлигии шаҳрвандон обу лойқа ворид карда, қисман зарар расонидааст.
Гуфта мешавад, дар ҷойи ҳодиса гурӯҳи кории Кумита фаъолият дорад ва ҳаҷми зарари расида ва ёриҳои эҳтимолӣ ба зарардидагонро мушаххас мекунад.
Зимнан зикр мегардад, ки хушбахтона, ин селҳо талафоти ҷониву хисороти дигар надоштанд.
Бино ба маълумоти Агентии обуҳавошиносии ҷумҳурӣ, то 4 феврал дар қаламрави ҷумҳурӣ обуҳавои номусоид дар назар буда, болоравии сатҳи об дар дарёҳо ва ҳодисаҳои тармафароиву сел аз эҳтимол дур нест.
