Аз 1 сентябри соли 2024 ҳамаи синфҳои русии мактабҳои таҳсилоти миёнаи умумии кишвар бо китобҳои дарсӣ таъмин карда мешаванд. Нашри китобҳои дарсиро ҷониби Русия ба уҳда гирифта, барои ин 200 млн рубл ҷудо кардааст. Дар ин бора зимни нишасти матбуотӣ вазири маориф ва илми ҷумҳурӣ Раҳим Саидзода хабар дод.
Ба гуфтаи ӯ, ин масъала дар вохӯрии президенти Тоҷикистон Эмомалӣ Раҳмон бо сарвазири Русия Михаил Мишустин дар Русия (ноябри соли 2023 – идора) баррасӣ шудааст.
“Имрӯз дар ҷумҳурӣ 244 муассисаи таҳсилоти умумӣ бо синфҳои русӣ ва 60 мактаби пурра таълимашон бо забони русӣ амал мекунанд. Ҳозир мутахассисони Русия ва Тоҷикистон барои мутобиқ сохтани китобҳои бо назардошти меъёрҳои миллӣ кор мекунанд. Онҳо моҳи феврал бояд натиҷаҳои кори худро пешниҳод кунанд. Дар назар аст, ки китобҳои дарсӣ то оғози соли ояндаи хониш ба мактабҳо расонида шаванд”, – гуфт вазир.
Ёдрас мекунем, ки соли 2022 дар Тоҷикистон бо дастгирии Русия панҷ мактаби таълимашон бо забони русӣ боз шуд.
Раҳим Саидзода изҳор намуд, ки соли 2023 дар маҷмӯъ зиёда аз 6 млн китобҳои дарсӣ нашр шудааст.
“Ин имкон дод, ки мактабҳо 94% бо китобҳо таъмин шаванд. Масалан, соли 2022 ин нишондиҳанда 63%-ро ташкил дода буд. Тӯли як сол бо дастгирии молиявии ҳукумат ва шарикони рушд мо тавонистем, ки ин нишондиҳандаро 31% зиёд кунем”, – иброз дошт вазир.
Ӯ ҳамчунин зикр кард, ки барои пардохти иҷораи китобҳои дарсӣ низоми биллингӣ ҷорӣ хоҳад шуд.
“Айни замон аз ҷониби Вазорати маориф ва илм лоиҳа таҳия мешавад. Волидон пули иҷораи китобҳои дарсиро метавонанд тариқи телефон пардохт кунанд, ба онҳо паёмак (смс) бо маълумот дар бораи китоб ва маблағи пули иҷора фиристода мешавад. Мо байни ширкатҳое, ки ба насби низоми биллангӣ машғуланд, озмун эълон кардем. Умедворем, ки то оғози соли нави хониш пурра ба низоми биллингии пардохти иҷораи китобҳо гузарем”, – афзуд вазир.
