Агентии рушди байнулмилалии KazAID-и Қазоқистон ба сафорати Тоҷикистон дар Қазоқистон барои таҳсили мутахассисон оид ба технологияҳои иттилоотӣ (IT-мутахассисон) дар доираи барномаи рушди сармояи инсонии «Tech Orda» аз Astana Hub 100 ваучер дод.
Тавре ки дар сомонаи KazAID хабар дода мешавад, дар чаҳорчӯби Барнома иштироки фаъолонаи ҷавонон аз Тоҷикистон дар Барномаи «Tech Orda», ки ба таҳсили IT-мутахассисон дар IT-мактабҳои пешрафтаи хусусӣ нигаронида шудааст, пешниҳод мешавад.
Пешниҳоди мазкур барои ҷавонони қобилиятноки тоҷик ҷиҳати истифодаи имконоти худ дар соҳаи технологияҳои иттилоотӣ бо шумули таҳияи сомонаҳо, кибербехатарӣ, таҳияи барномаҳо дар Python, FullStack, C# ва Data Science шароити мусоид фароҳам оварда, ба онҳо ҷиҳати дарёфти малакаҳои муҳиму рӯзмарра дар соҳаи технологияҳои иттилоотӣ кумак мекунад.
“Қазоқистон дорои сатҳи баланди рақамисозӣ буда, омода аст, ки таҷрибаи пешрафтаи худро ба дигар кишварҳои минтақа омӯзонад”, – зикр кардаанд дар KazAID.
Ташаббуси мазкур қисмате аз кумаки расмӣ ба рушд ва дастгирии ҷавонон дар Осиёи Марказӣ мебошад, ки ба таҳкими муносибатҳои шарикӣ байни Қазоқистон ва Тоҷикистон равона шудааст.
