Дар семоҳаи аввали соли ҷорӣ содироти молу маҳсулот аз Қазоқистон ба давлатҳои ҳамсояи минтақаи Осиёи Марказӣ кам шуд. Дар ин бора Zakon.kz хабар медиҳад.
Гуфта мешавад, дар зарфи се моҳи соли соли 2024 ҳаҷми гардиши моли хориҷии Қазоқистон ба 31,2 млрд доллар расид. Ин нишондиҳанда 5,6% камтар дар муқоиса бо нишондиҳандаи ҳамин давраи соли 2023 мебошад.
Дар ҳамин ҳол, гардиши молу маҳсулот бо кишварҳои минтақаи Осиёи Марказӣ (Қирғизистон, Тоҷикистон, Туркманистон ва Ӯзбекистон) 5,1% аз ҳаҷми умумиро ташкил дода, ба 1,6 млрд доллар расидааст. Дар ин бора дар сомонаи Пажуҳишгоҳи таҳқиқоти иқтисодӣ хабар дода мешавад.
Ҳаҷми муомилоти моли хориҷии Қазоқистон бо кишварҳои Осиёи Маркази тариқи зайл тақсим шудааст:
Ӯзбекистон – 895,5 млн доллар (55,8%);
Қирғизистон – 337,7 млн доллар (21,1%);
Тоҷикистон – 264,8 млн доллар (16,5%);
Туркманистон – 105,3 млн доллар (6,6%).
Дар ҳамин давраи солҳои гузаштаи панҷ соли ахир афзоиши нишондиҳандаҳои гардиши моли хориҷии Қазоқистон бо ҳамаи кишварҳои Осиёи Марказӣ ба мушоҳида мерасид.
Дар таҳқиқот зикр мешавад, ки аммо дар семоҳаи аввали соли 2024 нишондиҳандаҳои савдои дуҷонибаи молу маҳсулот бо Ӯзбекистон 16,2%, Қирғизистон – 7,5%, Тоҷикистон – 13,7% ва бо Туркманистон – 5,2% коҳиш ёфтааст.
Дар портали kapital.kz хабар дода мешавад, ки дар семоҳаи аввали соли 2024 ҳаҷми содироти молу маҳсулот аз Қазоқистон ба кишварҳои Осиёи Марказӣ 1,2 млрд долларро ташкил додааст, ки 10,9% камтар аз нишондиҳандаи ҳамин давраи соли 2023 аст.
Ин ба коҳиши ҳаҷми содироти гандум ба андозаи 38,3%, дастгоҳҳои телефон – 20,3%, инчунин тилло дар ҳаҷми 41,9% марбут будааст.
Дар сохтори содирот ҳиссаи гандум – 16,8% (204,3 млн доллар), дастгоҳҳои телефон – 4,7% (57,7 млн доллар), оби минералӣ ва газнок – 3,9% (48,2 млн доллар), сихҳои оҳанин ва фӯлодӣ – 3,7% (45,4 млн доллар) ва ғайра зиёдтар мебошад.
Ҳаҷми воридот бо кишварҳои Осиёи Марказӣ дар ин давра 385,3 млн долларро ташкил додааст, ки 20,5% камтар нисбат ба ҳамин давраи соли гузашта аст.
Дар сохтори воридот бордонҳо барои мошинҳои сабукрав – 12,1% (46,5 млн доллар), маъдан ва консентратҳои металлҳои қиматбаҳо – 7,4% (28,7 млн доллар), муҳаррик барои автомашинаҳо – 6,4% (24,5 млн доллар) ва ғайра афзалият доранд.
