Дар Душанбе таҳти роҳбарии Рустами Эмомалӣ, раиси Маҷлиси миллии Маҷлиси Олии Ҷумҳурии Тоҷикистон иҷлосияи 21-ум, даъвати шашуми ин ниҳод оғоз гардид. Дар ин бора телеграм-канали шаҳрдории Душанбе иттилоъ додааст.
Дар иҷлосия 44 масъала мавриди баррасӣ қарор хоҳад гирифт.
Бояд гуфт, додани ризоият барои аз вазифаи Прокурори генералии Ҷумҳурии Тоҷикистон озод намудани Раҳмон Юсуф Аҳмадзод ва ба ин вазифа таъин намудани Воҳидзода Ҳабибулло Сайдулло, инчунин аз вазифаи раиси Суди Олии Ҷумҳурии Тоҷикистон озод намудани Шермуҳаммад Шоҳиён ва ба ин вазифа таъин намудани Рустам Мирзозода аз масъалаҳое аст, ки дар назар аст, зимни иҷлосия баррасӣ карда шавад.
Фармони барканории Юсуф Раҳмон ва Шермуҳаммад Шоҳиён моҳи январ аз ҷониби Эмомалӣ Раҳмон, раиси ҷумҳури кишвар имзо гардид ва барои ризоият ба Маҷлиси миллии Маҷлиси Олӣ ирсол шуда буд.
Ба ҷойи Юсуф Раҳмон, Ҳабибулло Воҳидзодаи 60-сола таъйин шудааст, ки то ин дам дар мақоми Додситони ҳарбӣ кор мекард. Мақоми нави Юсуф Раҳмон, ки даҳ соли ахир Додситони кул буд, феълан маълум нест.
Ба ҷойи Шермуҳаммади Шоҳиён, ки дар садри рӯйхати номзадҳо ба вакилии парлумон аз ҷониби Ҳизби халқии демократии Тоҷикистон қарор дорад, дар мансаби раиси Додгоҳи олӣ номзадии Рустам Мирзозода пешниҳод шудааст. Рустам Мирзозода 50-сола аст ва аз соли 2022 то ин дам раиси Додгоҳи олии иқтисодӣ буд.
Қарор аст, зимни ҷаласаи Маҷлиси миллӣ Додситони кул дар бораи раванди иҷрои қонунҳо дар кишвар гузориш диҳад.
Маҷлиси миллии Тоҷикистон 33 аъзо дорад. Рустами Эмомалӣ, шаҳрдори Душанбе раиси Маҷлиси миллии Маҷлиси Олӣ аст.
