Дар пайи сарозер шудани як мошин бо ронанда ва 6 мусофир ба дарёи Панҷ, 5 сафаркунанда ғарқ шудаанд. Ронанда ва як мусофири дигар то чапа шудани мошин, худро аз он ба берун партофта, наҷот ёфтаанд.
Вазорати корҳои дохилӣ гуфтааст, ки ин ҳодиса бегоҳии 20-уми май дар километри 417-и шоҳроҳи “Қулма-Хоруғ-Дарвоз-Кӯлоб” дар деҳаи Вишхарви ноҳияи Дарвоз рух додааст.
Ба гуфтаи мақомот, Ҳаким Гулзоров, ронандаи мошини “Тойота Ландкрузер” аз уҳдаи идораи воситаи нақлиёт набаромада, "ба тарафи чапи роҳ ҳаракат карда ба дарёи Панҷ чаппа шудааст".
Ба иттилои манбаъ ронанда ва як мусофири дигар худро аз мошин ба берун партофта наҷот ёфтаанд. Ҳарду дар беморхона қарор доранд. Дар бораи вазъи саломатии онҳо маълумот дода нашудааст.
Панҷ мусофири дигар дар дарёи Панҷ ғарқ шудаанд ва то ҳол ҷасади онҳо ёфт нашудааст. Дар миёни ғарқшудагон се ноболиғони 1, 9 ва 10 сола низ ҳастанд.
Мақомот гуфтаанд, ки Ашула Почоева, зани 54-сола ҳамроҳи набераи яксолааш Муиз Маҷнунов, Мадина Афзалхонова зани 33-сола ҳамроҳи писараш Нуралишо Айналишоеви 10-сола ва Акрам Саркорови 9-сола ғарқ шудаанд.
Ба навиштаи манбаъ ҷустуҷуи ҷасадҳо идома дорад.
Мақомот гуфтаанд, ки ронанда ва мусофирон сокинони Хоруғ будаанд, ки ба самти Душанбе ҳаракат доштаанд.
Дар як ҳафтаи охир ин дуввумин ҳодисаи сарозер шудани мошин ба дарёи Панҷ аст. Рӯзи 17-уми май як мошини боркаш ба дарёи Панҷ афтода, ронандааш, ки гуфта мешуд сокини шаҳри Душанбе аст, ба ҳалокат расид. Ӯ соҳиби ду фарзанд будааст.
Гуфта мешуд, ки талоши наҷотдиҳандагон барои ёфтани мошин ва ронандаи он бенатиҷа будааст. Мақомот то имрӯз аз ёфт шудани ҷасади ин ронанда хабар надодаанд.
