Дар Тоҷикистон 2-юми марти соли ҷорӣ интихоботи парлумонӣ доир гардид. Дар натиҷаи овоздиҳӣ аз 41 ҳавзаи якмандатии шаҳру навоҳии ҷумҳурӣ 41 вакил интихоб шуда, дар 37 ҳавза номзади ҲХДТ, дар 2 ҳавза номзади ҲИИТ ва дар 2 ҳавза номзади ҲАТ баранда шуданд.
Дар харитаи Азия-Плюс метавонед шаҳр ё навоҳии худро пайдо карда, рӯйи ишора ангушт бизанед ва аз корномаи вакилатон огоҳ гардед:
Бино ба гузориши Комиссияи марказии интихобот ва раъйпурсӣ (КМИР), Ҳизби халқии демократии Тоҷикистон аз рӯйхати ҳизбӣ бо дарёфти 51,9 дарсади овозҳо 12 курсиро соҳиб гардид.
Ҳизби аграрии Тоҷикистон бошад бо дарёфти 5 курсӣ бо 21 дарсади овозҳо дар ҷойи дуюм аст. Ҳамчунин Ҳизби ислоҳоти иқтисодӣ 3 курсӣ, Ҳизби сотсиалистӣ 1 курсӣ ва Ҳизби демократии Тоҷикистон 1 курсӣ ба даст оварданд.
Ҳизби коммунистии Тоҷикистон дар ин интихоботи парлумонӣ бекурсӣ монд.
Дар ҷамъ ҲХДТ аз 63 курсии парлумон 49 кирсиро соҳиб шуд, ки ин ду курсӣ бештар нисбат ба парлумони даъвати шашум аст.
ҲАТ 7 курсии парлумонро гирифт ва ин такрори натиҷаи панҷ соли пеш аст.
ҲИИТ бо 5 курсӣ дар парлумон, натиҷаи панҷ соли пешро такрор намуд.
ҲДТ ва ҲСТ ҳам мисли 5 соли пеш яктогӣ курсии парлумонро соҳиб шуданд.
ҲКТ тариқи ҳавзаҳои якмандатӣ ҳам натавонист номзадеро вориди парлумон кунад. Ва ин бори аввал аст, ки ҲКТ дар парлумони Тоҷикистон бидуни вакил мемонад.
Ҳизби сотсиал-демократии Тоҷикистон дар интихоботи парлумонӣ иштирок накард ва сабаби иштирок накарданашро ҳам шарҳ надод. Ин ҳизб ҳарчанд солҳои пеш дар интихобот иштирок мекард, аммо ҳеҷ гоҳ соҳиби мандат нашудааст.
