Вазорати корҳои хориҷаи Ӯзбекистон бо ирсоли як нотаи расмӣ ба Вазорати корҳои хориҷаи Русия аз онҳо хостааст, шахсияти фарде, ки дар Химкии вилояти Маскав як ронандаи таксии узбекро таҳқир кардааст, шиносоӣ карда, алайҳи ӯ чораи қонунӣ андешад. Дар ин бора Аҳрор Бурҳонов, сухангӯи ВКХ Ӯзбекистон хабар дод, менависад Оҷонсии хабарии “Фарғона”.
Ба гуфтаи ӯ, ҷониби Ӯзбекистон иттилооти расонаҳо ва шабакаҳои иҷтимоиро бодиққат назорат мекунад ва дар сурати ошкор шудани чунин ҳодисаҳо бо ниҳодҳои зирабти кишварҳои дигар ҳамкориро оғоз мекунад.
“Аз ҷумла, дар робита ба ҳодисае, ки дар моҳи август вокунишҳои густурдаи ҷомеаро ба бор оварда буд, тафтишот идома дорад ва дар ин робита ба Вазорати корҳои хориҷии Русия нотаи расмӣ фиристода шуд”, – гуфтааст Бурҳонов.
Вай таъкид кардааст, ки ҳимояи ҳуқуқи шаҳрвандони Ӯзбекистон, новобаста аз он ки онҳо дар куҷо ҳастанд, афзалияти давлат боқӣ мемонад.
Наворе, ки дар шабкаҳои иҷтимоӣ сару садоҳои зиёдеро ба бор овард, рӯзи 27-уми август дар телеграм-канали "TRT” нашр шуд. Дар навор дида мешавад, ки марди русе ба як ронанда, ки зоҳиран зодаи Осиёи Марказӣ аст, суханони қабеҳ гуфта, ӯро таҳқир мекунад, аз ҷумла, ронандаи таксиро “ғуломи русҳо” мехонад.
Худи ронандаи таксӣ кӯшиш мекунад, оромиро нигоҳ дошта, аз мард талаб мекунад, ки таҳқирро хотима диҳад, вале чун мард хомуш намешавад, ронанда аз назди вай дур мешавад.
Ба гуфтаи шоҳидон, муноқиша аз он сабаб рух додааст, ки такси як муддати кӯтоҳ даромадгоҳи ҳавлиро баста, мунтазири гузаштани мошини партовгоҳ будааст.
Худи ҳамон шом дар телеграм-канали Аҳрор Бурҳонов ёддоште пайдо шуд, ки шаҳрвандони Ӯзбекистон новобаста аз кишвари истиқоматашон таҳти ҳимояи давлат мебошанд.
"Дар сурати поймол шудани ҳуқуқ ва озодиҳои онҳо ба онҳо тавсия дода мешавад, ки ба консулгарии наздиктарин муроҷиат кунанд", – ишора кард ӯ.
