Дар доираи амалисозии Нақшаи генералии шаҳри Душанбе дар қаламрави ноҳияи Синои пойтахт панҷ микрорайони нав таъсис дода мешавад, хабар дод ба “Азия-Плюс” як манбаъ аз дастгоҳи раиси шаҳри Душанбе.
Дар микрорайонҳои нав ба ҷуз биноҳои истиқоматии баландошёна ва иншооти таъиноти иҷтимоӣ, дигар қариб ҳамаи бинову иншооти куҳнаву фарсуда кӯчонида мешавад.
Микрорайони нави 121 дар қаламрави маҳаллаи Испечак-1 бунёд мегардад. Микрорайон аз шимол кӯчаи Нусратулло Махсум, аз ҷануб – Канали калони Ҳисор, аз шарқ – чанде аз қисмати микрорайони 102-юм ва аз шарқ – мавзеи назди бинои сафорати ИМА дар Душанберо фаро мегирад.
Микрорайони нави дигар – 113-ум дар қаламрави маҳаллаи Испечак-2 бо фарогирии қисмате аз кӯчаи Нусратулло Махсум, аз шарқ – кӯчаи Ҳисор ва аз ғарб – кӯчаи Испечак ташкил карда мешавад.
Микрорайони сеюм – 31-ум аз шарқ – хиёбони Саъдии Шерозӣ, аз ҷануб – маҳаллаи Роҳи нав, аз шарқ – кӯчаи Раҳмон Набиев ва аз ғарб – кӯчаи Маяковскийро дар бар хоҳад гирифт.
Қаламрави микрорайони нави чорум аз маҳаллаи Чортут, аз шимол – кӯчаи Абай, аз ҷануб – маҳаллаи Хуҷандӣ ва кӯчаи Деҳотӣ, аз шарқ – хиёбони Борбад ва аз ғарб – Корхонаи истеҳсоли ноқил (Кабелный завод) иборат хоҳад буд.
Микрорайони панҷуми №10 дар қаламрави маҳаллаи Камонгарон бунёд гардида, аз шимол – кӯчаи Ҳувайдуллоев ва аз ҷануб – кӯчаи Клара Сеткинро дар бар мегирад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
