Омӯзгорони шаҳри Душанбе аз раиси пойтахт Рустами Эмомалӣ дархост намудаанд, ки нисбати шахсони масъул, ки рӯзҳои якшанбе муаллимонро ба кор ҷалб мекунанд, чораҷӯӣ шавад.
Дар гурӯҳи «Педагоги Таджикистана» дар Facebook Рустам Шокиров зери унвони “Дар Душанбе рӯзҳои якшанбе омӯзгоронро истисмор мекунанд!” (В Душанбе эксплуатируют учителей по воскресеньям!) навиштае ба нашр расонида, изҳор доштааст, ки ин маводро бо хоҳиши худи омӯзгорон чоп кардааст, зеро онҳо метарсанд, ки дар сурати аз ҷониби худи онҳо гузоштани он аз кор озод карда мешаванд.
“Омӯзгорони бечора (аксарият – занон) ба рӯбучину тозакунии боғу гулгашт, ва наҳру ҷӯйҳо машғуланд, ҳатто аз ҳисоби худашон барои иҷрои кори ҷисмоние, ки пардохт намешавад, ба Варзоб бурда мешаванд! Чаро дигарон ба ҷойи муаллимон намераванд?! Масалан, вакилон (депутатҳо), кормандони БДА, бонкҳо, вазорату идораҳо ва дар ниҳояти кор, худи кормандони Хоҷагии манзилию коммуналӣ?!”, – менависад ӯ.
Ин масъала дар саҳифаҳои тоҷикии шабакаи Facebook мавриди баҳси гарму ҷӯшон қарор гирифт. Норозиҳо хеле бисёранд.
Дар ҳамин ҳол, расман ва мувофиқи қонун, агар муаллимонро ба кори берун аз мактаб ҷалб кунанд, маблағи он бояд пардохт ё ба онҳо дар вақти дигар рӯзи истироҳат дода шавад.
– Моддаи 8-и Кодекси меҳнат кори маҷбуриро манъ кардааст. Муаллимон барои ҳимоя аз ҳуқуқҳои худ дар ин маврид пеш аз ҳама, ба Комиссияи ҳуқуқи башар ҷиҳати дастгирии ҳуқуқии касбӣ ва ҳамчунин бо шикоят аз кори маҷбурӣ ба прокуратура муроҷиат карда метавонанд, – мегӯяд роҳбари ширкати ҳуқуқии “Ҳимоя” Наврӯз Одинаев. – Прокуратура пас аз санҷиш вобаста ба хусусияти вайрон кардани қонунгузорӣ дар бораи меҳнат дар бораи оғози парвандаи ҷиноятӣ ё маъмурӣ қарор қабул мекунад.
Бино ба гуфтаи ҳуқуқшинос, мувофиқи сархати 3, моддаи 35 Конститутсияи Тоҷикистон, ҳеҷ касе ба кори маҷбурӣ ҷалб шуда наметавонад, ба ҷуз ҳолатҳои дар қонун муайяншуда. Қонунгузорӣ дар бораи меҳнат меъёрҳои ҳатмие чун “шанбегӣ” ё “якшанбегӣ” надорад.
Қобили зикр аст, ки як ҳафта пеш боз ҳам дар шабакаи тоҷикии Facebook, аз ҷумла дар гурӯҳи “Мы Таджикистанцы” масъалаи ҷалби хонандагони мактаб ба чунин “шанбегӣ”-ҳо баррасӣ шуда буд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
