Вазорати маориф ва илми Тоҷикистон барои қабули омӯзгорон ва хонандагон дар мактабҳои таҳсилоти умумии русзабон дар шаҳрҳои Душанбе, Хуҷанд, Бохтар, Кӯлоб ва Турсунзода, ки тибқи ваъдаи мақомот бояд то 1 сентябри ҳамин сол ба истифода дода шаванд, озмун эълон менамояд.
“Вазорати маориф ва илми Тоҷикистон барои қабули омӯзгорон ба муассисаҳои давлатии буҷетии таҳсилоти миёнаи умумии муштараки Русия-Тоҷикистон бо омӯзиши амиқи фанҳо (таълимашон ба забони русӣ) дар шаҳрҳои Душанбе, Хуҷанд, Бохтар, Кӯлоб ва Турсунзода озмун эълон менамояд”, – зикр мешавад дар эълони Вазорат.
Аз довталабон доштани шаҳрвандии Русия ё Тоҷикистон, донистани забонҳои русӣ ва тоҷикӣ, таърих ва фарҳанги халқҳои Русия ва Тоҷикистон, донистани санадҳои меъёрии ҳуқуқии танзимкунандаи соҳаи маориф талаб карда мешавад. Илова бар ин, онҳо бояд маҳорату малакаи истифодаи технологияи информатсионии муосир, истифодаи усулҳои муосири таълим ва хушмуомилагӣ бо хонандагон ва падару модарро дошта бошанд.
Қабули ҳуҷҷатҳо то 24 майи соли 2022 давом карда, довталабон метавонанд онҳоро ба Сарраёсати маорифи шаҳри Душанбе шуъбаҳои маорифи шаҳрҳои Хуҷанд, Бохтар, Кӯлоб ва Турсунзода пешниҳод кунанд.
Ҳамчунин Вазорати маорифи ва илми ҷумҳурӣ барои қабули хонандагон (синфҳои 1-8) ба ин мактабҳо низ озмун эълон кардааст.
Довталабон метавонанд ба Сарраёсати маорифи шаҳри Душанбе шуъбаҳои маорифи шаҳрҳои Хуҷанд, Бохтар, Кӯлоб ва Турсунзода ҳуҷҷатҳои зеринро барои иштирок дар озмун пешниҳод намоянд: ариза оид ба иштирок дар озмун; нусхаи шиноснома; маълумотнома аз ҷойи истиқомат; маълумотномаи тиббӣ ва расм (3х4) 4 дона.
Хуҷҷатҳои довталабон бояд бо забонҳои тоҷикӣ ва русӣ омода карда шуда, қабули ҳуҷҷатҳо то 28 майи соли 2022 идома меёбад.
Ёдрас мекунем, ки қаблан вазири корҳои хориҷии Русия Сергей Лавров ва муовини раиси ҳукумати Русия Алексей Оверчук изҳор дошта будунд, ки панҷ мактаби русзабон дар Тоҷикистон 1 сентябри соли равон дарҳои худро барои толибилмон боз мекунанд.
Сохтмони мактабҳои таълимашон бо забони русӣ дар Тоҷикистон аз ҷониби Русия ташаббуси муштараки сарони кишварҳои Тоҷикистону Русия аст. Сохтмони мактабҳои мазкур дар доираи Созишномаи байниҳукуматӣ байни Русия ва Тоҷикистон аз 17 апрели соли 2019 амалӣ мешавад.
Чунин мактабҳо дар 5 шаҳри Тоҷикистон: Душанбе, Кӯлоб, Хуҷанд, Бохтар ва Турсунзода сохта мешаванд. Барои сохтмони ҳар кадоме аз мактабҳо ҳудуди 1 млрд 200 млн рубли русӣ ҷудо карда мешавад. Ҳар кадоме аз мактабҳо барои бо таҳсил фаро гирифтани 1200 хонанда пешбинӣ шудааст.
