Дар шаҳри Душанбе аз 13 июл ҳаракати ҳама гуна воситаи нақлиёт тариқи кӯчаи А.Қаҳҳоров қатъ шуд.
Тавре ки ба “Азия-Плюс” аз шаҳрдории пойтахт хабар доданд, роҳ аз чорроҳаи кӯчаи А.Қаҳҳоров бо хиёбони хиёбони Саъдии Шерозӣ (гардиш ба рост пас аз пули дарёи Душанбе дар назди ГЖК) то кӯчаи М.Маҳмадалӣ (гардиш ба Мясокомбинат) то 25 август баста мешавад.
“Автобусҳои №6 ва №42, инчунин маршруткаҳои №1 ва №11, ки бо ин роҳ равуо мекарданд, акнун тариқи кӯчаҳои Абай, Фучик ва Соҳилӣ ҳаракат мекунанд”, – гуфтанд дар шаҳрдорӣ.
Аз шаҳрвандон ва ронандагони воситаҳои нақлиёт хоҳиш карда мешавад, ки аз роҳҳои дигар кӯчаҳои ҳамшафат истифода баранд.
Дар шаҳрдории пойтахт харитаи муваққатии алтернативии ҳаракати автобус ва маршруткаҳоро пешниҳод карданд.
Ёдрас мекунем, ки кӯчаи А.Қаҳҳоров дар пойтахт бар асоси Нақшаи генералии шаҳри Душанбе таъмиру навсозӣ мешавад.
Аз ҷумла, дар ин ҷо васеъ кардани роҳ, иваз кардани рӯйпӯш, сохтмони обпартоҳо ва ғайра ба нақша гирифта шудааст. Барои бехатарии ҳаракати нақлиёт ва пиёдагардон чароғҳои роҳнамо, аломатҳо, сохтмони истгоҳҳо, нишонгузории амудӣ ва уфуқӣ ва дигар воситаҳои муҳофизат пешбинӣ шудаанд.
Дар ин кӯча сохтмони роҳҳои дуқабата (дусатҳа) ба нақша гирифта шудааст: дар буриши хиёбонҳои С.Шерозӣ, Ҳ.Шерозӣ ва кӯчаи А.Қаҳҳоров, дар буриши кӯчаҳои А.Ҷомӣ ва А.Қаҳҳоров ва дар буриши кӯчаҳои Абай ва А.Қаҳҳоров.
Ҳамчунин, дар болои дарёи «Душанбе» аз кӯчаи Ҷануби-Ҳалқавӣ (Южно-Обходная) то кӯчаи А.Қаҳҳоров сохтмони пули автомобилгард бо дарозии умумии 2,57 км ба нақша гирифта шудааст.
Ҳадафи роҳандозии корҳои таъмиру навсозӣ баланд бардоштани самаранокӣ ва беҳтар намудани ҳаракати воситаҳои нақлиёт, паст намудани ҳолатҳои тамбашавӣ, таъмини бехатарии ҳаракати нақлиёт ва пиёдагардҳо дар ҳудуди шаҳри Душанбе, инчунин мутобиқ сохтани роҳҳои пойтахт ба меъёрҳои байнулмилалӣ унвон шудааст.
Чӣ гуна тағйир ёфтани симои кӯча ва роҳи кӯчаи А.Қаҳҳоров дар ин маводи мо қобили дарёфт аст.
