Чанде қабл сафири Тоҷикистон дар ИМА Нуриддин Шамсов бо вакили Конгресси ШМА Ли Терри ва Сенатор Майк Ҷоҳанс (аз ҳизби ҷумҳурихоҳон) дар робита бо раванди имрӯзаи ҳамкории дуҷонибаи сиёсӣ, иқтисодӣ, сармоягузорӣ ва илмӣ-фарҳангӣ миёни ду кишвар мулоқотҳои ҷудогонаро анҷом дод.
Тавре аз сафорати ҶТ дар ИМА хабар доданд, сафир вакили Конгресси Ли Терри ва Сенатор Майк Ҷоҳансро ба таври муфассал бо вазъи минтақа ва дидгоҳи раҳбарият ва ҳукумати Тоҷикистонро доир ба роҳҳои минбаъдаи тавсеаи ҳамгироӣ ва ҳамкорӣ дар бахшҳои обу-энержӣ, саноат ва кишоварзӣ, мусоидат ба сулҳу субот дар Афғонистон ва хурӯҷи неруҳои байналмилалӣ аз ин кишвар, рушду нумӯи ҳамкории минтақавӣ дар Осиёи Марказӣ ва ташаббуси Тоҷикистон ҷиҳати таҷлили Соли байналмилалии об шинос кард.
Масъулини номбурда дар навбати худ саъю талошҳои Тоҷикистонро ҷиҳати таҳкими робитаҳои шарикона ва муносибатҳои гуногунҷанбаи сиёсӣ-иқтисодӣ бо ИМА, инчунин кӯмак ба барқарорсозӣ ва эҳёи иқтисодии Афғонистони ҳамсоя баланд арзёбӣ карданд.
Сафир ба ҷониби америкоӣ барои дастгирии узвияти Тоҷикистон ба Созмони Умумиҷаҳонии Савдо сипосгузорӣ намуда, изҳори умедворӣ кард, ки Конгресси ИМА ва аъзои он ба Тоҷикистон ҷиҳати бекор кардани иловаи қонуни Ҷексон-Веник соли ҷорӣ мусоидат хоҳанд кард. Сенатор Майк Ҷоҳанс ва вакили Конгресс Ли Терри итминон доданд, ки барои аз нав баррасӣ кардани ин мавзӯъ дар Конгресси ИМА ба Тоҷикистон кӯмак хоҳанд намуд.
