Шоми рӯзи 30-юми сентябр тавассути шабакаҳои давлатии телевизионии «Шабакаи аввал» ва «Ҷаҳоннамо» дар бораи амалҳои тафтишотии ҷараёндошта оид ба далели дуюми таҷовуз ба номуси духтари ноболиғ аз ҷониби соҳибкор Зайд Саидов як сюжет намоиш дода шуд.
Шуҳрат Қудратов, адвокати соҳибкор аз ин амали ҳам шбакаҳои давлатии телевизионӣ ва ҳам мақомоти масъули тафтишот изҳори нигаронӣ намуд.
«Чун тафтишоти ин парванда то ҳанӯз идома дошта, он муҳри махфӣ дорад, мо бар ин назарем, ки пахши сюжети мазкур нақзи эҳтимолияти бегуноҳии тибқи қонун муқарраршуда ва ҳамчунин риоя накардани талаботи моддаи 161-и КҶ ҶТ (Таҳти тафтиш қарор доштани тафтишоти пешакии парвандаҳои ҷиноӣ) аст. Гузашта аз ин, макомоти тафтишот аз мо оид ба ифшо накардани сирри тафтишот забонхат гирифта буданд», – мегӯяд Қудратов.
Дар сюжет наворҳои амалҳои тафтишотӣ, аз ҷумла тартиби рӯбарӯкунӣ намоиш дода мешавад, ки дар он ҷабрдидаи имконпазир аз миёни се нафар мардони ҳузурдошта Зайд Саидовро ҳамчун шахси ба номусаш таҷовузкарда мешиносад. Дар идома духтар аз ҳодиса ва ҷойи содир шудани он ҳикоят мекунад.
Ба қавли адвокат, ҳеҷ касе ҳуқуқ надошт, ки ин амали тафтишотиро ба маърази умум гузорад, зеро тафтишот идома дошта, ба ифшои тафсилоти он ҳуқуқ дода нашудааст.
«То имрӯз аз рӯйи далели боз як таҷовуз ба номус маросимҳои шинохтан ва рӯбарӯунӣ доир гардида, ҳатто айбдоршаванда дар ин маврид то ҳол бозпурсӣ нашудааст, ки ӯро ба воситае дар ин айб гунаҳкор кунанд. Чун тафтишот аз ҷониби Прокуратураи генералӣ ва Агентии зиддифасод гузаронида мешавад, мо аз болои ин амал ба прокурори генералӣ шикоят хоҳем бурд. Гурӯҳи тафтишотиро прокурори Агентии зиддифасод Зуҳал Раҳимов роҳбарӣ мекунад», – афзуд адвокат.
Ёдрас мекунем, ки дар ду маросими рӯбарӯкунии шаби 25-уми сентябр бо ҷабрдида
дар парвандаи нави таҷовуз ба номус
ва шоҳиди ӯ соҳибкор Зайд Саидов далели таҷовуз ба номуси духтари 15-соларо рад карда буд.
