Нашрияи интернетии русиягии «Сотовик» иттилоъ медиҳад, ки Тоҷикистон ба сафи кишварҳои дорои арзиши баланди интернети мобилӣ нисбат ба даромади моҳонаи аҳолӣ маҳсуб меёбад.
Ин нашрия натиҷаҳои мониторинги нархҳо ба интернети мобилӣ дар кишварҳои гуногунро ба чоп расонида, ҳамчунин онҳоро ба даромади моҳонаи аҳолӣ муқоиса намудааст.
Бино ба ин маълумот, 500 Мбайт дар Тоҷикистон ба ҳисоби миёна 39,6 доллари ИМА арзиш дорад, ки 21,8%-и даромади миёнаи моҳонаи тоҷикистониёнро ташкил медиҳад. Дар қаламрави Иттиҳоди Давлатҳои Мустақил Қирғизистон низ ба сафи кишварҳои пешсаф дар ин радиф қарор дошта, дар ин кишвар таносуби арзиши интернети мобилӣ ба даромади миёнаи аҳолӣ ба 27,4 $ (арзиши интернети мобилӣ) – 15,8% (даромади миёнаи моҳонаи аҳолӣ) баробар мебошад.
Нашрия менависад, тафовут чандон назаррас набошад ҳам, ин маблағ барои шаҳрванди амрикоӣ ҳамагӣ 2,1%-и даромади моҳонаашро ташкил дода, вале сокинони Африқо барои он бояд 28,4%-и даромади моҳонаашонро пардохт намоянд.
Гуфта мешавад, таносуби арзиши интернети мобилӣ нисбат ба даромади моҳона дар Русия – 27,6 $ (2%), Белорус – 14,3 $ (1,1%), Украина – 13,5 $ (2,6%), Қазоқистон – 7,9 $ (1,0%), Олмон – 12,4 $ (0,4%), Дания – 63,3 $ (1,8%) Испания – 40 $ (1,6%) ва Олмон – 38,2 $ (1,8%)-ро ташкил медиҳад.
«Дар ҳар як кишвар операторони мобилӣ тартибот, суръату тарофаҳои муайян барои корбарони Интернетро муқаррар намуда, суръат ва арзиши интернети мобилӣ ба як қатор омилҳо, аз ҷумла рақобат, сиёсати танзимшаванда ва сатҳи ҷорисозии технологияҳо вобаста аст», – зикр мегардад дар маълумоти нашрияи мазкур.
Қобили зикр аст, ки аз рӯи натиҷаҳои 7 моҳи соли ҷорӣ шумори корбарони шабакаи Итернет дар Тоҷикистон беш аз 3,7 млн. нафар ва корбарони алоқаи мобилӣ беш аз 9,9 млн. нафарро ташкил дод, ки зиёда аз 6,1 млн. нафари онҳо муштариёни фаъол мебошанд.
Дар ҷумҳурӣ шаш оператори фаъоли мобилӣ ва ҳудуди 20 ширкатҳои фароҳамсози Интернет амал мекунанд.
