Сафири Британияи Кабир дар Тоҷикистон Робин Орд-Смит ба ниҳодҳои интизомии Тоҷикистон барои саривақт пароканда кардани пикети ғайриқонунӣ дар назди бинои сафорат изҳори миннатдорӣ мекунад.
Дар изҳороти интишоршудаи сафир дар ин робита зикр мегардад, ки сафорат ва ҳукумати Британияи Кабир озодии баён ва ҳуқуқ ба баргузории намоишу гирдиҳамойиҳоро дастгирӣ мекунад, вале аз он мутаасиф аст, ки аз ҷониби иштирокчиёни пикет ба амволи сафорат зиён оварда шудааст.
«Ман тасдиқ мекунам, ки ҳеҷ кадоме аз кормандони сафоратхона осеб надида, мо аз ҳукуматдорони тоҷик миннатпазирем, зеро вақте кор то амалҳои зӯроварӣ расид, онҳо саривақт ба пароканда кардани намоиш кумак карданд», – омадааст дар изҳорот.
Сафир гуфтааст, мушаххасан огаҳ нест, ки сабаби баргузории ин намоиш чист, зеро ба сафоратхона дар ин бора ҳеҷ мактуб ё огоҳиномае нарасидааст. «Вале ман ва сафоратхонаи Британияи Кабир барои бо тарзи созанда ҳамкорӣ намудан бо ҷомеаи шаҳрвандӣ омода ва хушнудем», – изҳор кардааст Робин Орд-Смит.
Ёдрас мекунем, ки санаи 10-уми июн дар назди сафоратхонаи Британияи Кабир дар Тоҷикистон
пикети ғайриқонунӣ
баргузор шуда, бо боздошти якчанд нафар хотима ёфт. Ин амал аз ҷониби панҷ нафар зан сурат гирифта, онҳо ба сӯйи бинои сафоратхона сангу шиша партофтаанд.Вақте посбонони бинои сафоратхона кӯшиш кардаанд, ки ба ин амали онҳо монеъ шаванд, чор нафар мардон ҳам ба занҳо ҳамроҳ шудаанд. Мардон посбононро лату кӯб карда, занон ба сангу шишапартойӣ ба бинои сафоратхона идома доданд.
Дар ҳамин ҳол, бо супориши Вазири корҳои дохилӣ генерал-лейтенанти милитсия Раҳимзода Рамазон Ҳамро оид ба ҳодисаи рӯзи 10 июни соли 2014 дар шаҳри Кӯлоб нисбати роҳбарияти Ҳизби наҳзати исломи Тоҷикистон рухдода,
гурӯҳи корӣ
бо роҳбарии муовини Вазири корҳои дохилӣ генерал-майори милитсия Солеҳзода Искандар таъсис дода шуда, санҷиши ҳодисаи мазкур идома дорад.
