– Таҳримҳои иқтисодие, ки дар робита ба рӯйдодҳои Украина ИМА, иттифоқчиёни он дар Созмони Аҳдномаи Атлантикаи Шимолӣ (НАТО) ва кишварҳои Иттиҳоди Аврупо нисбати Русия ҷорӣ карданд, оянда муқобили худи ин кишварҳо хоҳад шуд, – мутмаин аст раиси Ҳизби коммунисти Тоҷикистон, вакили палатаи поёнии парлумон Шодӣ Шабдолов.
Ба андешаи ӯ, захираҳои иқтисодӣ, зеҳнӣ, низомӣ ва табиии Русия онро аз ҳама гуна таҳримҳо ҳимоя карда метавонанд ва коҳиши имрӯзаи қурби асъори Русия нисбати доллар ва евро падидаи муваққатӣ аст.
«Русия бо Чин оид ба роҳандозии савдо ва сармоягузории дуҷониба танҳо бо асъори миллии ҳарду кишвар ба мувофиқа расид ва ояндаи наздик Маскав бо Эрон, Ҳиндустон, як қатор давлатҳои Амрикои Лотинӣ ва кишварҳои узви ИДМ низ чунин созишномаҳо ба имзо расониданист, ки дар ниҳояти кор ба таҳкими қурби рубл ва коҳиши қурби доллар оварда мерасонанд», – таъкид дошт раиси Ҳизби коммунист.
Шабдолов зикр кард, ки ҳама гуна таҳримҳо нисбати ҳар кишваре дар ниҳояти кор ин давлатро маҷбур месозанд, ки захираҳои дохилиашро дарёфта, аз онҳо пурсамар истифода кунад, ки вобастагӣ ба дигар кишварҳоро кам мекунад. «Таҳримҳои чандинсолаи ҷоришуда аз ҷониби як қатор кишварҳои Ғарб нисбати Эрон дар ниҳояти кор ба рушду шукуфоии соҳаҳои зиёди иқтисоди ин кишвар боис гардиданд», – афзуд номбурда.
