Созишномаи байниҳукуматии Қазоқистону Тоҷикистон оид ба ҳамкорӣ дар соҳаи огаҳӣ ва рафъи оқибатҳои ҳолатҳои фавқулода ҷиҳати тасдиқ ба баррасии ҷаласаи Сенати Қазоқистон пешниҳод шудааст.
Бино ба иттилои хадамоти матбуоти Сенати Қазоқистон, созишномаи мазкур ба фароҳам сохтани заминаи ҳуқуқи барои роҳандозии ҳамкориҳо миёни Тоҷикистону Қазоқистон дар соҳаи мудофиаи гражданӣ, огаҳиву пешгирӣ ва рафъи оқибатҳои ҳолатҳои фавқулода нигаронида шудааст.
Дар созишнома мақомоти ваколатдор, шаклҳои ҳамкорӣ навъҳои кумак, тартиби расонидани кумакҳои мутақоибла ҳангоми рафъи оқибатҳои ҳолатҳои фавқулода ва ҳамоҳангсозии амалҳои муштарак муайян шуда, ғайр аз ин, меъёрҳои тартиби мавриди амал қарор гирифтани созишнома, мавридҳои ворид намудани тағйироту иловаҳо ба он, ҳолатҳои ҷуброни хисорот ва ҳалли баҳсҳо пешбинӣ шудаанд.
Гуфта мешавад, тасдиқи созишнома ба коҳиши хатари офатҳои табиӣ ва ба ҳадди камтарин расонидани оқибатҳои манфии ҳолатҳои фавқулода дар қаламрави ҳарду кишвар ва ҳамчунин рушд ва такмили минбаъдаи фаъолияти сохторҳои наҷотдиҳандаи кишварҳо мусоидат хоҳад кард.
