Шӯрои олии сиёсии Ҳизби наҳзати исломии Тоҷикистон дар ҷаласаи рӯзи 14 август дар Душанбе сана ва макони баргузории анҷумани навбатии ҳизбро муайян мекунад.
Муовини раиси ҲНИТ Маҳмадалии Ҳайит ба «Азия-Плюс» дар ин робита иттилоъ дод, ки дар анҷумани навбатӣ раҳбарияти ҲНИТ аз фаъолияти чорсола натиҷагирӣ намуда, пешвои нави ҳизб интихоб карда мешавад. «Раҳбари нави ҳизб дар муҳлати навбатиро танҳо анҷуман муайян мекунад ва айни замон пешгӯиҳо дар ин маврид барвақт аст», – таъкид дошт Ҳайит.
Ёдрас мекунем, ки баъд аз нокомӣ дар интихоботи парлумонии моҳи марти соли равон дар Тоҷикистон, раиси ҲНИТ Муҳиддин Кабирӣ ба хориҷи кишвар раҳсипор гардида, аллакай муддати беш аз 5 моҳ аст, ки асосан дар Туркия иқомат дорад.
Бо ишора ба фишори афзояндаи ҳукуматдорон болои аъзои ҳизб, раҳбарияти ҲНИТ оғози парвандаи ҷиноӣ нисбати Муҳиддин Кабирӣ пас аз бозгашт ба ватанро аз эҳтимол дур намедонад.
Дар ҳамин ҳол, Прокуратураи генералии Тоҷикистон
изҳор намуд,
ки айни замон нисбати раиси ҲНИТ Муҳиддин Кабирӣ парвандаи ҷиноӣ боз нашудаааст. Вазири корҳои дохилии Тоҷикистон Рамазон Раҳимзода низ дар ин робита изҳор намуд, ки ба пешвои ҲНИТ дар Тоҷикистон ҳеҷ хатаре вуҷуд надорад.
Ёдрас мекунем, ки
Муҳиддин Кабирӣ дар конфронси байнулмилалӣ
таҳти унвони «Осиёи Марказӣ: таҳдидҳои муосир», ки рӯзи 17 июн дар шаҳри Маскав доир гардид,
изҳор намуда буд
, ки мутмаин аст, дар ватан ба ӯ ҷавобгарии ҷиноӣ таҳдид карда метавонад.
Рӯзи 16 июни соли равон нашрияи ҳукумат «Ҷумҳурият» таҳти унвони
«Асрори пушти пардаи тиҷорати Кабирӣ»
маводе ба чоп расонид, ки дар он раиси ҲНИТ ба ғайриқонунӣ хусусигардонии қитъаҳои замин ва иншооти давлатӣ айбдор карда мешавад.
