Пешвои миллат Эмомалӣ Раҳмон имрӯз, 15 июн дар дастгоҳи иҷроияи худ ва Агентии зидди коррупсия тағийроти кадрӣ роҳандозӣ намуд. Ҳардуи ин сохтори давлатиро фарзандони сарвари давлат – мутаносибан
Озода Раҳмон
ва
Рустами Эмомалӣ
роҳбарӣ мекунанд.
Бино ба иттилои хадамоти матбуоти сарвари давлат, бо амри президент Ҷабборзода Одил Абдуқаҳҳор бо сабаби ба кори дигар гузаштанаш аз вазифаи сардори Раёсати молияи Дастгоҳи иҷроияи Президенти Тоҷикистон озод ва ба ҷойи ӯ Ҳалимзод Абдураҳмон Достӣ – сардори Раёсати молияи Дастгоҳи иҷроияи Президенти Ҷумҳурии Тоҷикистон таъин карда шуд.
Ҳамчунин бо фармони сарвари давлат, Наимӣ Аламхони Қодириён бо сабаби ба кори дигар гузаштанаш аз вазифаи муовини якуми Директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон озод карда шуд.
Дар ҳамин ҳол, дар робита ба барҳам додани Шӯрои адлияи ҷумҳурӣ, Муродзода Дустмурод Ҳайит аз вазифаи раиси Шӯрои адлияи ҶТ, Расулзода Нуриддин Ғафор аз вазифаи муовини якуми раиси Шӯрои адлияи ҶТ ва Пӯлодӣ Мавҷуда Комил аз вазифаи муовини раис – котиби Шӯрои адлияи Тоҷикистон озод карда шуданд.
Ҳамчунин пешниҳоди Президенти Ҷумҳурии Тоҷикистон Эмомалӣ Раҳмон оид ба таъин намудани Расулзода Нуриддин Ғафор ва Пӯлодӣ Мавҷуда Комил ба вазифаи судяи Суди Олии Ҷумҳурии Тоҷикистон ба Маҷлиси миллии Маҷлиси Олии Ҷумҳурии Тоҷикистон ирсол гардид.
Ғайр аз ин, Бо Амри президенти бо сабаби барҳам додани Шӯрои адлия Завқизода Солеҳ Амин аз вазифаи Директори Маркази таълимии судяҳо дар назди Шӯрои адлияи Ҷумҳурии Тоҷикистон озод ва ба вазифаи Директори Маркази таълимии судяҳои назди Суди Олии Ҷумҳурии Тоҷикистон таъин карда шуд.
Дар навбати худ бо қарори ҳукумат Самадзода Навруз Абдулҳамид бо сабаби ба кори дигар гузаштанаш аз вазифаи Сардори Хадамоти назорати давлатӣ дар соҳаи меҳнат, муҳоҷират ва шуғли аҳолии Вазорати меҳнат, муҳоҷират ва шуғли аҳолии Ҷумҳурии Тоҷикистон озод ба ҷойи ӯ Муродзода Дустмурод Ҳайит ба ин вазифа таъин карда шуд.
