Дар Қазоқистон 2 нафар гирифторони коронавирус ба қайд гирифта шуданд. Дар ин бора имрӯз, 13-уми март вазири тандурустии Қазоқистон Елжан Биртанов зимни брифинг иттилоъ дод.
Ба гуфтаи ӯ, ин ҳолатҳои сироятёбӣ дар Алмаато тасдиқ шудааст: зану мард рӯзҳои 9 ва 12-уми март аз Олмон ба Қазоқистон баргаштаанд.
“Онҳо дар беморхонаи сироятии Алмаато бистарӣ шуда, худро хуб ҳис мекунанд. Ҳамаҷониба тадбирҳои зарурӣ андешида мешаванд”, – изҳор доштааст Биртанов.
Вазир қайд кардааст, ки дар ҳавопаймои аввал (9-уми март) 73 нафар мусофирон будаанд.
“Онҳо бемор набуда, муддати 14 рӯз ба карантин гирифта мешаванд. Ҳавопаймои дуюм шаб омад, ки аз 12 нафар иборат буда, ҳама бо шумули ҳайати сарнишинон аллакай дар карантин ҷойгир шуданд”, – хабар дод ӯ.
Зикр шуд, ки ба қабули қарор дар бораи эълони ҳолати фавқулодда ҳокими шаҳр ҳуқуқ дорад, аммо худи вазир инро алҳол зарур намедонад.
“Пас аз муайян кардани ҳамаи шахсони бо онҳо алоқадошта ё пайдо шудани беморони нав, шояд чуин қарор қабул шавад”, – илова кардааст Биртанов.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
