Чанде қабл дар Вазорати корҳои хориҷии ҷумҳурӣ мулоқоти муовини вазири корҳои хориҷии Тоҷикистон Низомиддин Зоҳидов бо намояндаи минтақавии Раёсати СММ оид ба маводи мухаддир ва ҷинояткорӣ (ЮНОДК) Александр Сичёв доир гардид.
Бино ба маълумоти Вазорати корҳои хориҷии ҷумҳурӣ, муовини вазир аз сатҳи ҳамкориҳои ЮНОДК бо мақомоти дахлдори кишвар изҳори қаноатмандӣ намуда, барои мусоидат дар таҳкими иқтидори миллии Ҷумҳурии Тоҷикистон ҷиҳати мубориза бар зидди гардиши ғайриқонунии маводи мухаддир, татбиқи барномаҳои миллӣ ва минтақавӣ миннатдорӣ намуд. Низомиддин Зоҳидов диққати Александр Сичёвро ба масъалаҳои таҳкими ҳифзи сарҳад ва ҷабҳаҳои иҷтимоии мубориза бо маводи мухаддир, ки метавонад дар афзудани ҳамкориҳо мусоидат кунад, ҷалб намуд.
Дар ин маврид Александр Сичёв фаъолияти мақомоти зиддимухаддири Ҷумҳурии Тоҷикистонро мусбат арзёбӣ намуда, аз ҳамкориҳои самарабахш дар татбиқи барномаҳои ЮНОДК дар Тоҷикистон изҳори сипос намуд. Қайд карда шуд, ки ЮНОДК дар самти таҳкими ҳифзи сарҳадоти кишварҳои ҳамсояи Афғонистон диққати хоса медиҳад. Зимни вохӯрӣ, Намояндаи минтақавӣ оид ба чорабиниҳои пешбининамуда ва ҳамкориҳои минбаъда бо Тоҷикистон иттилоъ дод.
