Вазири адлияи ҶТ Рустам Менглиев дар ҷамъи рӯзноманигорон иттилоъ дод, ки шумори иттиҳодияҳои ҷамъиятӣ дар Тоҷикистон ҳудуди 2,5 ҳазор ададро ташкил медиҳад, ки асосан созмонҳои хайрияву ҷавонон ва ташкилотҳои ғайриҳукуматии гендерӣ мебошанд.
«Соли гузашта дар Тоҷикистон 201 иттиҳодияи ҷамъиятӣ ба қайд гирифта шуд», – таъкид кард вазири адлия.
Ба қавли Р.Менглиев, соли гузашта 1 ҳазору 71 иттиҳодияи ҷамъиятӣ бинобар сабаби иҷро накардани талаботи қонун оид ба пешниҳод кардани маълумот дар бораи идомаи фаъолият огоҳинома гирифтааст. «Ба судҳо 14 даъво пешниҳод гардида 9-тои он қонеъ гардонида шуданд ва фаъолияти се созмон боздошта шуд», – гуфт Менглиев.
Ғайр аз ин, зикр гардид, ки соли 2011 мақомоти сабти асноди ҳолати шаҳрвандии ҷумҳурӣ 94 ҳазору 618 адад шаҳодатномаи ақди никоҳ (соли 2010 – 100 ҳазору 440 адад) ва 200 ҳазору 475 адад шаҳодатнома дар бораи таваллуди кӯдак (соли 2010 – 189 ҳазору 187 адад) додаанд.
