Сафири Фавқулодда ва Мухтори Ҷумҳурии Сотсиалистии Ветнам дар Тоҷикистон ҷаноби Ле Ман Луан ба вилояти Суғд ташриф овард.
Тавре аз хадамоти матбуоти раиси вилояти Суғд хабар доданд, дар мақомоти иҷроияи ҳокимияти давлатии вилоят вохӯрии Сафири Фавқулодда ва Мухтори Ҷумҳурии Сотсиалистии Ветнам дар Тоҷикистон ҷаноби Ле Ман Луан бо муовини Раиси вилоят Мубинҷон Қайюмов доир гашт.
Мубинҷон Қайюмов ҷаноби Ле Ман Луанро ба сарзамини Хуҷанди бостонӣ хайрамақдам гуфта, дар бораи вилояти Суғд, соҳаҳои иҷтимоиву иқтисодии вилоят маълумоти муфассал дод.
Мубинҷон Қайюмов қайд намуд, ки дар вилоят якчанд коргоҳҳои саноатӣ амал мекунанд. Аз ҷумла корхонаҳои муштарак бо мамолики Италия, Эрон, Чин, Туркия, Руссия ва дигар кишварҳо фаъолият мебаранд.
Дар соҳаи кишоварзӣ ба рушди соҳаи пахтакорӣ эътибори ҷиддӣ равона гардида, роҳбарияти вилоят кӯшиш дорад, ки бевосита дар ҳудуди навоҳии пахтакор корхонаҳои коркарди пахта бунёд намуда, коркарди ин ашёи гаронбаҳо дар вилоят равнак дода мешавад.
Ҳамчунин Мубинҷон Қайюмов зикр кард, ки бо Ҷумҳурии Сотсиалистии Ветнам ҳамкориҳо дар соҳаи абрешимчигӣ ба роҳ монда шуда, чанд сол инҷониб дар вилоят корхонаи муштараки Тоҷикистону Ветнам «ВТ-Силк» фаъолият дорад.
Сафири Фавқулодда ва Мухтори Ҷумҳурии Ветнам Ле Ман Луан барои пазироии хуб дар сарзамини меҳмоннавози вилояти Суғд арзи сипос намуда, нақши вилоятро дар пешрафти иқтисодиву иҷтимоии Тоҷикистон муҳим арзёбӣ кард.
Ӯ ният дорад минбаъд ҳамкориро дар соҳаи кишоварзӣ, аз ҷумла дар соҳаи истеҳсоли абрешим равнақ бахшида, дар соҳаи моҳипарварӣ низ ба роҳ монад.
Дар охир Ле Ман Луан роҳбарияти вилоятро ба Ҷумҳурии Сотсиалистии Ветнам таклиф намуд.
