Имрӯз дар Маркази русиягии илму фарҳанг дар Душанбе бахшида ба 20-умин солгарди роҳандозии муносибатҳои дипломатӣ байни Тоҷикистону Русия конфронси байнулмилалӣ ба кор оғоз мекунад.
Тавре аз маркази мазкур хабар доданд, конфронс аз ҷониби сафорати Русия дар Тоҷикистон, намояндагии ташкилоти ҳамкории Русия дар ҶТ, ҷамъияти дӯстии «Тоҷикистон – Русия» ва ҳаракати ҷамъиятии «Дӯстони Русия» созмон дода шудааст.
Конфронс бо мақсади баррасии масоили муҳими рушди муносибатҳои дуҷонибаи шарикона дар марҳилаи кунунӣ баргузор мешавад. Дар ҷараёни кори конфронс ҳамчунин масоили вазъи кунунӣ ва дурнамои ҳамкориҳои дуҷониба дар бахшҳои гуманитариву фарҳангӣ ва мушкилоту дурнамои ҳамкории иқтисодӣ дар марҳилаи кунунӣ низ баррасӣ мешаванд.
Дар кори конфронс иштироки сафири Русия дар Тоҷикистон Юрий Попов, намояндагони вазорату идораҳо ва дигар сохторҳои давлатии Тоҷикистон ва ҳамчунин намояндагони созмонҳои байнулмилаливу ҷамъиятӣ дар назар аст.
Ёдрас мекунем, ки 8-уми апрели соли 1992 миёни Тоҷикистону Русия муносибатҳои дипломатӣ роҳандозӣ шуданд.
