Маркази нозироти санитарӣ-эпидемиологии минтақаи Кӯлоб фаъолияти корхонаи истеҳсоли намаки чанде қабл дар ноҳияи Ҳамадонӣ ифтитоҳшудаи Иттифоқи касабаи Тоҷикистонро муваққатан манъ намуд.
Тавре ба ОИ «Азия-Плюс» сардухтури санитарии минтақаи Кӯлоби вилояти Хатлон Саидасвар Алимов хабар дод, коргоҳи мазкур бо қонушиканиҳои дағалона фаъолият дошта, дастгоҳи йодкунии намак ба талабот ҷавобгӯ нест ва дар коргоҳ шароитҳои оддии санитарӣ мавҷуд нестанд.
«Умуман коргоҳ бидуни иҷозати хадамоти санитарии ноҳияи ба фаъолият шурӯъ намуда, 900 кило намаки ғизоӣ то бартараф кардани камбудиҳо аз фурӯш ба анборҳо баргардонида шуд», – гуфт ӯ.
Дар ҳамин ҳол, имрӯзҳо дар се корхонаи истеҳсоли намаки ноҳияи Восеъ 3 тонна намки ғизоӣ барои йодкунии зарурӣ баргардонида шудааст.
Ба қавли номбурда, дар Кӯлоб кормандони хадамот 1,7 тонна намаки техникиеро мусодира намуданд, ки ҳамчун намки ғизоӣ ба фурӯш бароварда шуда буданд. «Ин миқдор намак аз муомилот мусодира ва тибқи санад баҳри истифода ба комбинати муассисаҳои коммуналии шаҳр дода шуд», – афзуд номбурда.
