Субҳи имрӯз нахуствазири Тоҷикистон Оқил Оқилов ҷиҳати иштирок дар ҷаласаи навбатии Шӯрои нахуствазирони кишварҳои узви Иттиҳоди Давлатҳои Мустақил, ки ба рӯзи 31-уми май таъин шудааст, ба пойтахти Белорус – шаҳри Минс раҳсипор шуд. Дар ин бора ба ОИ «Азия-Плюс» як манбаъ аз ҳукумати ҷумҳурӣ хабар дод.
Бино ба иттилои интишоршудаи хадамоти матбуоти Кумитаи иҷроияи ИДМ, дар ҷаласа имзои Протокол дар бораи минтақаи савдои озод аз 18-уми октябри соли 2011 миёни Тарафҳои он ва Ҷумҳурии Ӯзбекистон дар назар аст, ки механизмҳои ҳуқуқии муносибатҳои Ӯзбекистон бо кишварҳои узви Шартнома дар бораи минтақаи савдои озод муайян карда мешавад.
Ба иттилои манбаъ, иштирокчиёни ҷаласа ҷараёни амалисозии Барномаи байнидавлатии ҳамкории инноватсионии кишварҳои узви ИДМ дар соли 2012 ва дар давраи то соли 2020-ро баррасӣ хоҳанд кард.
Ҳамчунин баррасии Консепсияи таъсиси заминаи маълумоти патентҳо ва инноватсияҳои ИДМ пешбинӣ шудааст, ки ба тиҷоратикунонии босуръати натоиҷи фаъолияти илмӣ-техникӣ ва рушди соҳибкорӣ дар бахши инноватсия дар паҳнои Иттиҳод мусоидат мекунад.
Зимнан зикр мегардад, ки нахуствазирони кишварҳои узви ИДМ инчунин масоили ҳамкориҳо дар бахши гуманитариро низ баррасӣ мекунанд.
