Президенти Ҷумҳурии Арманистон Серж Саргсян ба муносибати аз нав ба мансаби президенти Тоҷикистон интихоб гардидани Эмомалӣ Раҳмон ба унвони ӯ барқияи табрикӣ ирсол намуд.
Бино ба иттилои хадамоти матбуоти сарвари давлат, дар барқияи шодбошии сарвари давлати Арманистон зикр мегардад, ки натиҷаҳои интихоботи баргузоргардида нишонаи эътибори баланд ва таҷрибаи ғании Шумо дар кори давлатдорӣ ҷиҳати рушди устувори кишвар, таҳкими сулҳу оромӣ дар ҷомеа ва баланд гардидани нақши Тоҷикистон дар арсаи байналмилалист.
«Аминам, ки муносибатҳои дӯстӣ миёни мардуми кишварҳоямон, инчунин талошҳои муштарак ҷиҳати ҳамкории фаъол ва ҳусни тафоҳум, таҳкими равобит дар доираи Созмони Аҳдномаи амнияти дастаҷамъӣ, ИДМ ва дигар ниҳодҳои бисёрҷониба барои татбиқи лоиҳаҳои нав дар соҳаҳои иқтисодиву гуманитарӣ нақши арзанда хоҳанд гузошт», – гуфта мешавад дар барқия.
