Бо мақсади ҷалби таваҷҷуҳ ба варзиш ва тарзи ҳаёти солим раиси шаҳри Душанбе Маҳмадсаид Убайдуллоев дар бораи таъини стипендия ба варзишгарони беҳтарини пойтахт қарор ба имзо расонид.
Бино ба иттилои хадамоти матбуоти мақомоти шаҳрдории пойтахт, бо ин мақсад аз воситаҳои озоди буҷети шаҳр 182 ҳазору 400 сомонӣ маблағ ҷудо карда мешавад. Стипендия ба шахсоне таъин карда шудааст, ки дар мусобиқоти ҷаҳонии соли 2013 ба дастовардҳои назаррас ноил гардидаанд.
Ба иттилои манбаъ, 31 нафар варзишгарон стипендиягирандагони мақомоти шаҳрдории пойтахт шудаанд, ки 14 нафари онҳо стипендияи дараҷаи 1 ва 17 нафар варзишгари дигар стипендияи дараҷаи 2-ро мегиранд.
