Раиси шаҳри Душанбе Маҳмадсаид Убайдуллоев нақшаи чорабиниҳо бахшида ба Рӯзи ҷавононро, ки ҳамасола санаи 23-уми май ҷашн гирифта мешавад, тасдиқ кард.
Бино ба иттилои хадамоти матбуоти мақомоти шаҳрдории пойтахт, рӯзи ҷумъа соати 5-и субҳ роҳпаймоии ҷавонон бо парчамҳои Тоҷикистон ба самти майдони «Дӯстӣ» оғоз мегардад. Дар майдон 1 ҳазор нафар ҷавонон бо тарзи зинда таҳти мусиқии оркестр Суруди миллии Тоҷикистонро месароянд.
Ба иттилои манбаъ, дар доираи таҷлили ҷашни Рӯзи ҷавонон дар пойтахт ҳамчунин чорабиниҳои фарҳангиву фароғатӣ, мусобиқаҳои варзишӣ, вохӯрии ҷаввонон бо собиқадорони ҷангу меҳнат, аёдати сарбозону афсарони Артиши миллӣ дар дармонгоҳҳои ҳарбӣ ба нақша гирифта шудааст.
Зимнан зикр гардид, ки шоми рӯзи 23-юми май дар «Наврӯзгоҳ»-и пойтахт бо иштироки сарояндагони ҷавони эстрадаи тоҷик консерти идона баргузор мегардад.
