Имрӯз соати 10:00 дар майдони «Дӯстӣ»-и пойтахт ба ифтихори 20-умин солгарди таъсисёбии нерӯҳои марзбонии Тоҷикистон, ки санаи 28-уми май ҷашн гирифта мешавад, гузашти низомӣ доир мегардад.
Дар гузашти низомӣ беш аз 10 ҳазор нафар сарбозону афсарони Сарраёсати нерӯҳои марзбонии КДАМ ҶТ, ВКД, Вазорати мудофиа, Кумитаи ҳолатҳои фавқулода ва мудофиаи гражданӣ, Гвардияи миллии Тоҷикистон ва ҳамчунин Сарраёсати иҷрои ҷазои ҷиноятии Вазорати адлияи ҷумҳурӣ иштирок мекунанд.
Тавре ба «Азия-Плюс» сардори маркази матбуоти Вазорати мудофиаи ҷумҳурӣ Фаридун Маҳмадалиев хабар дод, ба гузашт фармондеҳи гарнизони Душанбе генерал-майор Бахтиёр Рӯзминшоев роҳбарӣ карда, гузаштро фармондеҳи нерӯҳои марзбонии Тоҷикистон генерал-лейтенант Раҷабалӣ Раҳмоналӣ қабул мекунад.
Дар назди иштирокчиёни гузашт сарвари давлат Эмомалӣ Раҳмон, ки рӯзи якшанбе аз Беларус ба Душанбе баргашт, суханронӣ мекунад.
Дар робита ба гузашти низомӣ аз субҳи имрӯз ҳаракати нақлиёт дар маркази пойтахт маҳдуд карда шудааст.
