Дар ҷаласаи имрӯзаи Шӯрои маҷлиси намояндагони Маҷлиси Олии ҶТ таҳти раёсати раиси палатаи поёнии парлумони кишвар Шукурҷон Зуҳуров лоиҳаи ворид намудани тағйироту илова ба қонуни ҶТ ««Дар бораи маҷлисҳо, гирдиҳамоиҳо, намоишҳо, пикетгузориҳо ва роҳпаймоиҳо» баррасӣ шуд.
Дар тағйироти мазкур пешбинӣ мешавад, ки шахсони истифодабарандаи ба истилоҳ «коктейлҳои Молотов» (омехтаи сӯзанда аз маводи зудоташгиранда) дар макони маҷлисҳову гирдиҳамоиҳои шаҳрвандон ва ҷойи издиҳоми мардум, ба шахсоне баробар карда мешаванд, ки ғайриқонунӣ аз силоҳи оташфишон истифода мекунанд.
Мутобиқи қонунгузории Ҷумҳурии Тоҷикистон, дар ин ҳолатҳо кормандони мақомоти корҳои дохилӣ ба истифодаи таъҷилии силоҳи оташфишон нисбат ин гурӯҳи шахсон ваколатдор карда мешаванд.
Тавре ба «Азия-Плюс» котиби матбуотии палатаи поёнии парлумони ҷумҳурӣ Муҳаммадато Султонов хабар дод, дар ҷаласаи Шӯрои МНМО ҶТ ҳамчунин лоиҳаҳои тағйироту илова ба қонунҳои ҶТ «Дар бораи рӯзҳои ид», «Дар бораи фаъолияти аудиторӣ», «Дар бораи химзати давлатӣ» низ баррасӣ шуданд.
Дар идома зикр гардид, ки тамоми масъалаҳои аз ҷониби Шӯро баррасишуда ҷиҳати омӯзишу баррасии муфассал ба кумитаҳои дахлдори МНМО фиристода шуданд. Бо қарори Шӯро, ҷаласаи навбатии иҷлосияи панҷуми Маҷлиси намояндагони Маҷлиси Олии ҶТ даъвати чорум рӯзи 30-юми май дар шаҳри Душанбе доир мегардад.
