Дар соли хониши сипаришуда 300 нафар донишҷӯён аз Донишгоҳи давлатии шаҳри Қӯрғонтеппа (ДДҚ) хориҷ карда шуданд.
Бино ба гуфти ректори Донишгоҳ Маҳмад Шодиев, аз 300 нафар донишҷӯёни хориҷшуда 64 нафараш танҳо барои ширкат накардан дар таҷрибаомузӣи хориҷ шудаанд.
«Аслан мо ягон донишҷӯро барои азхуд накардани мавзӯъ ё фанҳои алоҳида хориҷ накардаем. Сабаби хориҷшавии донишҷӯён аслан муносибати хунукназарона ба рафти таълим аст, яъне ҳозир набудан дар дарсҳо», – гуфт вай.
Ҳамчунин зикр гардид, ки Донишгоҳ аз рӯи интихоби довталабон баъди Донишгоҳи миллии Тоҷикистон ва Донишгоҳи тиббӣ ҷои сеюмро ишғол кардааст. «Боиси хурсандист, ки беш аз 5 ҳазор довталабоне, ки аз қайди Маркази миллии тестӣ гузаштаанд, Донишгоҳи Носири Хусравро интихоб намудаанд», – афзуд номбурда.
