Мақомоти шаҳрдории Кӯлоб ва вакилони Маҷлиси вакилони халқи шаҳр барномаи рушди шаҳри Кӯлоб барои солҳои 2014-2018-ро тасдиқ карданд.
Муовини раиси шаҳри Кӯлоб Нуридин Бозоров ба «Азия-Плюс» дар ин робита изҳор намуд, ки дар барнома амалисозии 234 лоиҳаҳои хурду бузург ба маблағи умумии 1 млрд. 30 млн. сомонӣ пешбинӣ шудааст.
Ба гуфтаи ӯ, мутобиқи нақшаи стратегии рушди шаҳри Кӯлоб муддати 4 сол дар шаҳр бояд ду манзили зисти 9-ошёна, се манзили зисти 5-ошёна ва то садҳо манзилҳои хусусӣ сохта шаванд.
«Давоми 4 соли оянда дар шаҳру ноҳияи Кӯлоб 38 корхонаи хурди саноатӣ, 8 мактаби таҳсилоти умумӣ, шабакаи марказҳои хизматгузорӣ ба истифода дода шуда, дар 300 гектар боғҳои нав бунёд карда мешаванд», – иброз дошт номбурда ва илова намуд, ки дар натиҷаи амалисозии барномаи рушди стратегӣ то 18 ҳазор ҷойҳои нави корӣ фароҳам оварда мешавад.
